[A:39]sogs mkhas grub du ma las phar tshad 'dul mngon dbu sdom rig gnas dbang lung man ngag sogs gsan sbyong mthar phyin par mdzad de/ dgung lo nyer gsum bzhes pa sa mo sbrul gyi lo la gdan sa chen po dpal rtse gdong nyid du mkhan po thams cad mkhyen pa bsod nams lhun grub legs pa'i 'byung gnas rgyal mtshan dpal bzang po las kyi slob dpon gnas lnga rig pa'i paNDi ta chen po kong ston dbang phyug grub pa dpal bzang pos mdzad de/ dge 'dun grangs tshang ba'i dbus su bsnyen par rdzogs pa'i sdom pa bzhes/ bsnyen sgrub mthar phyin cing 'gro don rgya cher mdzad/ khyad par sa lo chen po zhing gzhan du gshegs rjes dpal nA lendrar kun mkhyen rong ston chen po'i rgyal tshab mdzad de bstan pa bskyangs/ dgung lo bzhi bcu zhe dgu pa shing mo lug gi lo la dpal thub bstan rnam par rgyal ba'i chos kyi grwa chen por mdo rgyud rgya mtsho lta bu'i mnga' bdag mkhyen rab gzhan dang mi mnyam pa'i blo gros mnga' ba kun mkhyen go bo rab 'byams pa chen po bsod nams seng ge'i gdan sar mnga' gsol te/ sde snod gtso bor gyur pa'i mdo sngags kyi 'chad nyan rlabs che ba mdzad/ nA lendra dang thub bstan rnam rgyal sogs su gsung ngag rin po che tshar du ma gnang zhing/ dpal gsang ba 'dus pa 'phags