[A:42]bzhugs pa'i dge 'dun rnams kyis kyang dkyil 'khor du ma'i sgrub mchod dang bsnyen sgrub la brtson pa'i sgrigs rim dang dus mchod kyi gzhi rten rgya cher mdzad/ rdzu 'phrul la sogs pa'i grub pa'i mtshan ma phal pa'i blo yul du mi shong ba zhig ste/ de yang dper mtshon tsam brjod na/ sngags 'chang chos kyi rgyal po'i rnam thar ngo mtshar rgya mtsho las 'di ltar 'byung ste/ dus de nyid kyi tshe rtse gdong nas gcen rin po che kun dga' bsam grub nyid blo bur du byon te/ mdzo mo zhig la sil snyan chung ngu gcig sogs rgyab khal dang bcas skas son drug bdun yod pa'i skas shig la thogs med 'khrid nas gzim phug gi nang du thal byon nas/ ngas o lo 'phrad par yong ba yin/ mdzo 'di gang du 'dogs gsungs pa la/ sngags 'chang bla ma de nyid kyis brag la phyag mdzub kyis bug pa zangs thal du btod nas/ 'di la 'dogs par zhu zhes gsungs pas/ sku 'khor ba rnams ha las par gyur cing/ bdag chen sku mched gnyis ka grub pa'i gtsug rgyan du thag chod pa yin no ces kyang thos/ zhes dang/ yang de nyid las/ bsam yas su byon pa'i rnam thar gyi thad nas 'di ltar gsungs te/ sngags 'chang bla ma yab sras kyi drung du/ bsam yas pa'i zhal ngo/ blon po gros dbang rnams dang/ gzhan