[A:629]rgyal ba gnyis pa sa skya'i bstan pa gdung rgyud sde dang bcas pa/ dbyar gyi dpal mo bzhin dar zhing rgyas pa'i 'phrin bcol bka' bsgo gnyer gtad dag mdzad cing / de tshe bdag cag gi yab rje gdod ma'i mgon po de nyid kyi yum gyi yab de nyid gshegs pa'i byang chog grub pa dang bstun gsungs las/ yab de skal ba dang ldan pa ste/ las sgrib rnam par dag nas dag pa'i zhing du song / nged kyis kyang da lan byang chog rjes ma yin gsungs/ bsngo smon shis brjod rnams rgyas par mdzad pa dang / de nas lo de'i hor zla bcu gcig pa'i bdag khri kun dga' bsod nams kyi 'khrungs ston skabs/ ban tshang pa bgres gzhon med la dam pa nyid nas phyag dbang skabs dbu thug mdzad nas/ de nyin bdag gi phyag dbang rjes ma yin/ da ni rang re tshe 'di la mjal ba zhig mi yong bas/ phyi ma ring min mjal ba'i thugs smon zhu zhing / bgres gzhon kun nas bstan pa'i zhabs tog hur bskyed mdzod cig ces bka' bstsal ba na/ tshang ma yid zhum ste ci yin nam ci yin nam zer zhing tshom mer lus/ de nas pho brang steng du phebs nas sku mched lhan rgyas sar yab rje pad ma'i mtshan can nyid kyis rang bzhin gyi gsung gleng sna tshogs mur/ nu bo rgyan mchog khyed rang lo shas bstan 'gro'i dpal du bzhugs/ bdag ni rgas shing gog pa'i lus 'di dor nas rkang bde mig gsal rnam rig grung ba/ byis pa gzhon nu'i lus rten zhig nges par 'dod gsungs pas/ gcung po kun rin lags nas jo lags de 'dra gsungs pas