[A:705]bzhi lnga tsam la yab rje rdo rje 'chang nas sku tshe 'dir phung khams skye mched sogs gsar du brnyes pa'i tshul bstan pa rnams/ lha'i ngo bor gdod ma nas gnas pa gsal btab pa sogs rgyud ma smin pa yongs su smin par byed pa'i thog mar bla na med pa'i gnyis med rgyud dpal kyai rdo rje dang / ma rgyud badzra ki la ya sogs kyi rdul tshon gyi dkyil 'khor du 'jug par mdzad de/ zab gsal gnyis med kyi dbang gis smin par mdzad pa dang / 'jam mgon sa paN gyi thugs dam gyi rten 'jam dbyangs rtsod rgyal ma sogs kyi drung du mchod tshogs dang bcas/ yab rje mchog nas 'jam dbyangs smra seng gi rjes gnang bstsal te/ thu mi sam bho Tas/ bslab pa kun gyi gzhi 'dzin cing / /rig byed smra ba rnams kyi rgyu/ /ming tshig brjod pa kun gyi gzhi/ /yi ge'i sbyor ba bshad par bya/ /zhes gsungs pa ltar/ yon tan gyi phyi mo gser bris gong ma rim byon gyi phyag dpe de nyid la brda sprod par mdzad pa tsam gyis dgongs shing / de nas yongs 'dzin dmigs sman grong pa'i drung rams pa grags pa rab rgyas bsko bzhag bstsal te rim bzhin chos spyod rab gsal/ rgyud 'debs chen mo/ rtsa rgyud brtag gnyis sogs thugs 'dzin rim par mdzad thog dgung grangs bdun tsam la yab rje mchog dang chos byang las tshan rnams kyi sar brtag gnyis rgyugs 'bul gnang ste/ sngar lam bzhin rgyud 'don zab ma'i tshogs dbur phebs shing / de nas dgyes rdor dang rdo rje phur pa/ bde gsang 'jigs