[A:52a] gdams pa zab mo gsungs pas/ rgyal po 'khor bcas grub pa thob ste mkha' spyod du bzhud pas re zhig yul phyogs de stong par gyur to/ /de lta bu'i slob dpon des ye shes kyi mkha' 'gro ma las chos dngos su nyan nus/ 'og min du rdo rje 'chang chen po las kyang dngos su gdams pa nod pa yin la/ de dag kyang dag pa'i snang ba kho nas mjal ba yin te/ grub chen nyid kyi gsung las/ ngas ni sangs rgyas stong dag la/ /bsnyen bkur yang dag ngas kyang byas/ /sa rab dga' ba ngas kyang thob/ /sprul pa bye ba phrag brgya yis/ /klu sgrub ArYa de wa dang / /bcom ldan 'das dang ngas gtam byas/ /nga rang bde ba can du 'gro/ /zhes kyang gsungs pa yin no/ /de nas mthar mkha' spyod du gshegs so/ /de nyid kyis rjes su bzung zhing byin gyis brlabs pa ni jo bo nA ro ta pa ste/ 'di ni yul kha che ba yin pa las/ dur khrod chen po gcig tu phyin nas bde mchog yi ge bdun pa'i bsten pa thon tsam na sa g.yos chen po byung ba na/ re zhig nas rnal 'byor ma sngon mo gnyis byung nas/ khyod shar phyogs pa tai lo pa'i rigs yin pas shar phyogs su song zhig zer/ khyed su yin dris pas/ slob dpon klu'i sring mo yin zer nas mi snang bar gyur to/ /de gang na bzhugs kyang 'dri ma nus snyam 'gyod bzhin pas shar phyogs su phyin pas/ gan dha bu ri'i gtsug lag khang du rnal 'byor pa ras nag po'i angga rag gon pa/ mig rtsa dmar zhing / so dung so 'khor mar yod pa/ dar dmar po'i cod pan bcings /