[A:54a] bar brgyab nas bde ba chen por brgyal lo/ /brgyal ba sangs tsa na theg pa mtha' dag gi chos thugs la shar te mi shes pa gang yang mi 'dug go /de'i dus su a thung skye ba med pa'i gdams ngag gnang ste/ mi mno/ mi bsam/ mi dpyad/ sems rang bzhin gyi gnas par zhog gsungs/ yang zhus pas/ bsam pa'i yul las 'das/ brjod pa'i tshig las 'das/ mtshon pa'i dpe las 'das/ tai lo pas ci yang bstan du med gsungs so/ /de ltar dka' spyad bcu bzhi po de re re la'ang mnyes tshor khyad par can re skyes shing sa bcu bzhi bgrod pa yin no zhes gsungs pa ni ma 'brel te/ dka' spyad dang po gsum dang bum dbang sogs sbyar bas dbang thob par bstan/ lo bcu gnyis su zhabs tog byas chos ci yang ma zhus zhes bshad pa ni dbang chos ma yin par gsung rgyur snang ba/ de ltar na gsang sngags kyi chos sam lam gyi rtsa ba dbang bskur nyid yin par rgyud sde thams cad las bsngags brjod dang bcas gsung par mi 'thad par 'gyur zhing / dka' spyad bcu bzhis sa bcu bzhi bgrod ces pa yang nor te/ sa bcu gsum zhes pa'i tha snyad gsungs kyis/ rdo rje theg pa'i lugs kyi sa bcu bzhi sogs su bshad pa ni sa btags pa pa'am/ 'thad ldan ma yin no/ /yang gser sding pas mdzad pa'i bla ma brgyud pa'i lo rgyus las/ de nas nA ro pas bla ma drin che bas drin lan zhig mdzad par dgongs nas byon pa na/ mgar ba'i gling du grogs po mgar ba gcig yod pa'i sar bzhag nas//