[A:5b] rnams kyis brtsams pa'i rgyud 'dra min sna tshogs pa zhig yod par rje ngor chen rdo rje 'chang gi gsung rgyun las 'byung zhing yongs su grags na yang / bstan pa snga dar gyi skabs su mkhas pa rnams kyi kha skad la/ sku'i rgyud sangs rgyas mnyam sbyor/ gsung gi rgyud zla bzang thig le/ thugs kyi rgyud gsang ba 'dus pa/ yon tan gyi rgyud rdo rje bdud rtsi/ 'phrin las kyi rgyud karma ma la/ kha skong gi rgyud rnam snang sgyu drwa/ zhes 'byung ba de dag gsar rnying gnyis ka la rtsod pa med par grags pa'i rgyud yin par bshad do/ /de ltar pha rgyud la sde gsum du gsungs pa'i 'dod chags can 'dul ba gsang ba 'dus pa 'di ji ltar byon pa'i tshul 'chad pa la spyi don rnam pa gsum ste/ 'dus pa'i rgyud ston pas ji ltar gsungs pa'i tshul/ 'dus pa la rgya bod du bshad srol ji ltar byung ba'i tshul/ 'dus pa'i bla ma brgyud pa'i rnam thar bstan pa'i sgo nas rgya bod du ji ltar dar ba'i tshul bshad pa'o/ /dang po ni/ 'o na gsang sngags 'dus pa 'di ston pas gnas gang du gsungs/ tshul ji ltar du gsungs/ de ltar gsungs pa'i rgyud de la du yod ce na/ grub chen kun dga' snying pos yo ga'i 'grel pa dang / gsang 'dus yo gar bkral ba'i 'grel pa las/ khyab 'jug la sogs pa'i rgyud la dga' zhing yul yongs su mi spong ba'i 'dod chags can rnams rjes su gzung ba'i phyir gzhan 'phrul dbang byed kyi gnas su gsang ba 'dus pa'i rgyud gsungs pa yin par bshad de/ ji skad du/ 'di ni rgyud phyi ma yin pas nges par gsang ba 'dus pa las shes par bya ste/ de las 'di nyid gsungs