[A:6a]pa ni/ de nas de bzhin gshegs pa mi bskyod pas de bzhin gshegs pa thams cad kyi btsun mo'i bha ga la dam tshig chen po'i dkyil 'khor gru bzhir byin gyis brlabs pa ni zhes bya ba la sogs pa'o/ /gzhal yas khang gi khyad par 'di yang nam mkha'i khams thams cad pa gzhan 'phrul dbang byed na dbang bsgyur gyi lha rnams kyi gnas na yod pa yin par shes pa bya ste/ 'dod chags can la sogs pa'i sems can rnams rjes su gzung ba'i phyir ston par mdzad pa yin pa'i phyir ro/ /zhes gsungs pas so/ /yang slob dpon a laM ka sha ste rgyan gyi rol pas/ ston pas dga' ldan gyi gnas su rang gi sku 'byung ba bzhi las gzhal yas khang sprul/ phung khams skye mched las dkyil 'khor gyi lha tshogs sprul ste/ de nas gsang ba 'dus pa'i rgyud gsungs par bzhed de/ slob dpon de nyid kyis mdzad pa'i rdo rje phreng ba'i 'grel pa las/ de nas bcom ldan 'das shAkya seng ges sngon bcom ldan 'das rnams kyis ston pa'i man ngag gis dbang po rnon po nyid kyi phyir mngon du mdzad nas nam phyed na bdud bcom ste tho rangs kyi dus su mngon par rdzogs pa sangs rgyas par mdzad nas dga' ldan gyi gnas su gshegs te/ rang gi sku'i 'byung ba chen po la sogs pa rnams las rin po che sna bdun las byas pa'i gzhal yas khang spros so/ /nyid kyi phung po rnams las de bzhin gshegs pa lnga dang / sa la sogs pa'i khams rnams las spyan ma la sogs pa'i lhan cig spyod ma bzhi dang / mig la sogs pa drug dang yan lag gi