[A:58b] dus su 'byor te/ de'i skabs na 'phags yul na paNDi ta mnyam po la/ 'dus pa la mkhas pa rnams gral mgor 'jog cing / chos 'dus pa la kha zin che bar 'dug nas thog mar 'dus pa slob dgos dgongs te/ gsang ba 'dus pa la su mkhas dris pas/ sa 'dres pa'i slob ma rnams mkhas zer bas/ mngon shes can/ btsun mo can rnams la 'dus pa'i chos skor gsan/ bslab sbyong yang 'dus pa la mdzad nas bod du byon/ de dus khams nas mar ston seng rgyal byon/ 'gos lo la chos mang du zhus/ zang zing gi dngos po bsam gyis mi khyab pas mnyes par byas/ slar yang 'gos kyis rgya gar du byon/ nag po dam tshig rdo rje la 'dus pa'i chos skor gsan/ de ltar paNDi ta mngon shes can/ btsun mo can/ nag po dam tshig rdo rje dang gsum la gsang ba 'dus pa'i chos skor mthil phyin par gsan nas bla ma gsum po de dag gi gsung bgros rnams so sor zin bris su 'bri bar mdzad pa la 'gos kyi shog ril gsum du grags/ gzhan yang rgya gar shar phyogs kyi paNDi ta sprin gyi shugs can la yang 'dus pa gsan pas/ 'gos kyi gsang 'dus gsan pa'i bla ma bzhi yin la/ 'ga' zhig las 'gos kyi gsang 'dus gsan pa'i bla ma gsum las ma bshad kyang / phyi ma 'di la yang gsan par 'gos lo nyid kyis rgyud kyi mchan chen gyi mjug tu bshad pas rtsod pa med/ 'on kyang gsang ba 'dus pa rim lnga'i khrid ni dang po gsum kho na las gsan par nges so/ /spyir lo chen 'dis 'phags yul du lan gsum byon/ gong gi /