[A:59a] bla ma bzhi po de'i steng du kha che khri brtan gyi tsandra ha ri/ bal po rdzong gi nA ga ko Ti/ bal po mthil gyi tsa huM ngu dang / sa ra ba bya ba rnams la sogs pa mi'i bla ma bdun cu/ mkha' 'gro ma gnyis te bdun cu rtsa gnyis te bdun cu rtsa gnyis bsten te mdo sngags kyi chos tshul bsam gyis mi khyab pa gsan/ chos dang chos min gyi rnam dbye legs par phye ba'i bstan bcos sngags log sun 'byin bya ba mdzad/ khyad par gsang ba 'dus pa la rtsa rgyud kyi tshig 'grel mchan chen dang / don 'grel stong thun chen mo sogs mdzad de 'dus pa'i bstan pa nyi ma shar ba ltar mdzad pa yin no/ /de lta bu'i 'gos kyi gsang 'dus gsan pa'i bla ma bzhi'i nang gi sprin gyi shugs can dang ga ya dha ra gnyis gcig yin par/ rje rdo rje 'chang gi gsung rgyun zin bris 'ga' zhig las bshad/ bu ston rin po ches rgya gar shar phyogs su rgyal po sprin gyi shugs can zhes bshad do/ /gang ltar 'gos lo 'dis rgya gar du yang lan gsum byon par paN chen nyi zla seng ge'i rnam bshad las bshad/ bu ston rin po ches ni bcu gnyis byon par bshad kyang / de ni yi ge ma dag gam snyam mo/ /gang ltar 'gos la slob ma yang rgyud kyi ka ba tshugs pa bzhi/ man ngag gi gdung ma theg pa brgyad/ las tshogs dang 'phrin las la mkhas pa rnams lcam dang gral ma gshibs pa ltar mang du byung ba yin pa las/ ka chen bzhi ni mar ston seng ge rgyal mtshan/ rlan grags dbang / sum ston me 'bar/ mi nyag dharmA tsandra /