[A:6b]tshogs thams cad dang / rus pa dang bcas pa thams cad las ji ltar srid par gzugs rdo rje ma la sogs pa lnga/ byang chub sems dpa' brgyad dang bcas pa dang / rang gi sku'i yan lag dang nye ba'i yan lag dang bcas pa rnams las khro bo bcu spros par gyur to/ /de'i rjes su de gtso bor gyur pa'i dkyil 'khor gyi 'khor lo nam mkha'i ngos khyab pa'i bcom ldan 'das la gsol ba btab nas/ 'dod chags can gyi 'dod chags spangs pa'i don du chags pa dang bral ba'i dbye bas rigs rnam pa bzhi nye bar bstan te/ gsang ba 'dus pa'i rgyud chen po stong phrag nyi shu rtsa lnga pa bstan par gyur to zhes rgyud rgyas pa gsungs tshul dang / yang de'i rjes su slar yang tshe dang lta ba dang nyon mongs pa dang / bskal ba dang sems can gyi snyigs mas sems can gyi khams la gzigs te/ dkyil 'khor ba de rnams la gsol ba btab pas nyung ngu'i rgyud kyi rgyal po dpal gsang ba 'dus pa zhes bya ba gzhung gi tshad brgya phrag bco brgyad pa le'u bco brgyad kyi bdag nyid can bstan par gyur to zhes rtsa rgyud bsdus pa gsungs tshul gsal bar bshad pas so/ /de ltar bzhed pa mi 'dra ba mang na yang / 'dir rje btsun sa skya pa rnams kyi bzhed pas spyir gsang sngags la ston pa 'di'i bzlas te ma gsungs pa dang gsungs pa gnyis su mdzad nas/ dang po ni/ 'khor lo bde mchog gi rtsa rgyud rgyas pa nam mkha' dang mnyam pa dang / dges rdor gyi rgyud 'bum phrag lnga pa dang / 'di'i rgyud 'bum phrag gsum pa sogs rtsa rgyud chen po rnams te/ 'di dag bzlas te ma