[A:74b]bdud rtsi'i rjes gnang ba/ /chos 'brel tsam gyi bla ma mang / /dpal singga gling pas sna drangs pa/ /snang ba 'gyur nges bcu gsum bzhugs/ /zhes gsungs pas so/ /gzhan yang bal po spyi ther ba/ ye shes snying po/ zhi ba bzang po/ mai tri pa/ nA ro paN chen sogs grub thob lnga yod de/ chos smon lam gyi 'brel pa bcu gsum bzhugs/ /khyad par grub thob zhal snga bzhugs/ /zhes gsungs/ de rnams kyi nang nas ye shes snying po la nub gu la kShe tra zhes bya ba'i gnas su rgyud gsang ba 'dus pa dang / man ngag sgyu lus dang 'od gsal/ 'dus pa rim lnga'i gdams ngag rnams zhus/ byang phu la ha ri bya bar nA ro pa la rgyud dges pa rdo rje dang / man ngag bsre 'pho gsan/ shar chu bo ganggAr mai tri pa la rgyud bstod pa glur blangs dang / man ngag phyag rgya chen po gsan/ lho dug mtsho khol mar dpal zhi ba bzang po la rgyud ma hA mA ya dang / man ngag dbyibs rnal 'byor gsum bya ba gsan pas 'di bzhi la khyad par du 'phags pa'i bla ma bzhi zhes kyang bya'o/ /de ltar yang nyid kyi gsung las/ nub gu la kShe tra'i grong khyer du/ /dpal ye shes snying po'i zhabs la gtugs/ /sgyu lus 'od gsal gyi gdams ngag thob/ /lam rim pa lnga yi don la bslabs/ /zhes sogs gsungs pas so/ /de bzhi'i nang nas kyang rgyal sras mai tri pa dang paN chen nA ro pa gtso bo lta bur mdzad de/ ji skad du/ rje 'gran gyi do med rnam gnyis bzhugs/ /gtso bo pan chen nA ro pa/ /de 'og rgyal sras mai tri pa/ /zhes gsungs/ de ltar