[A:77b]thang spe mkhan po tshul khrims skyabs la 'dus pa'i man ngag rdzogs par gnang ba yin te/ thang spe ba 'di ni mdo sde dang rgyud sde thams cad la mkhyen pa thogs med du rgyas pa/ lo bcu gnyis su sham thabs ma bzhes par stan thog gcig tu sgom sgrub mdzad pas rtogs pa chen po 'khrungs te/ bskyed pa'i rim pa la brtan pa thob/ rdzogs pa'i rim pa la rtags thon/ ngag rdo rje'i bzlas par 'byongs/ snang ba sgyu lus su 'byongs/ thugs 'od gsal gyi ngang la bzhugs/ zung 'jug gi ting nge 'dzin la mnga' brnyes pas snang ba la gnyis 'dzin gyi rtog pa zil gyis non pas/ dus rtag tu 'bras bu sangs rgyas kyi bzhugs tshul dang mthun par bzhugs te 'gro don mdzad pa zhig yin par bshad do/ /des thang spe ba 'phags pa skyabs la 'dus pa mar lugs yongs su rdzogs pa gnang ste/ 'di'i rnam thar ni gong du bstan zin la/ des grub thob gser sding pa gzhon nu 'od/ des kun mkhyen chos sku 'od zer/ des 'phags 'od yon tan rgya mtsho/ des bu ston thams cad mkhyen pa rin chen grub la gnang ba yin no/ /yang khon gad pa kIrtis/ mi nyag thur ba la/ dbus pa mgar dga'/ grub thob zhang zhung pa chos kyi dbang phyug ste thugs sras gsum la gnang / de gsum char la/ gang bar gser kha'i rin chen gling pa tshul khrims mdzes kyis zhus/ des rgya rnal 'byor pho ba lung pa la gdams te/ 'dis rim lnga bsdus gsal gyi 'grel pa sogs mar lugs kyi yig cha mang du mdzad/ des dge slong chos grags bzang po/