[A:8a]dang bshad pa'i rgyud rnams gsungs/ phyag na rdo rje la gtad/ der rgyal pos rgyud rnams gser gyi shog bu la baiDUrYa'i zhun mas bris te/ de dag bzhugs pa'i khang bu yang byas so/ /de nas rgyal po'i 'khor yul khams de na gnas pa'i mi thams cad dang / bya rog tshun chad kyang gtor zan zos pas grub pa thob ste/ rim gyis yul khams de stongs nas mtsho chen po gcig tu gyur/ mtsho de la klu mang po gnas shing mtsho 'gram du rim pas grong yang chags/ de nas slar yang phyag na rdo rjes mtshor gnas pa'i klu rnams la dbang bskur/ rgyud bshad/ lam bstan pas klu las byung ba'i dpa' bo dang rnal 'byor ma mang du byung ngo / /de nas mtsho de skam pas sngar rgyal pos bzhengs pa'i dpe khang de chus ma nyams par byung bas/ he ru ka rang byung gi gandho la zhes ming du btags/ de nyid deng sang yang bar snang la bzhugs shing skal ldan 'ga' res mthong ba yin par bshad do/ /de ltar du gsungs pa'i gsang ba 'dus pa'i rgyud la rtsa ba'i rgyud dang / bshad pa'i rgyud gnyis las/ dang po ni rtsa rgyud le'u bco brgyad pa 'di nyid de/ 'di'i yang le'u bcu bdun pa yan chad rtsa rgyud dang / le'u phyi ma'am rgyud phyi ma 'di ye shes zhabs lugs pas bshad rgyud du mdzad nas/ gsang ba 'dus pa'i bshad rgyud la rgyud phyi ma dang / rdo rje snying po rgyan gyi rgyud sde gnyis su nges par bzhed/ 'phags lugs la gsang ba 'dus pa'i bshad rgyud bzhir yod de/ ye shes rdo rje kun las btus pa'i rgyud/ /dgongs pa lung ston/