[A:8b] lha mo bzhis zhus/ rdo rje phreng ba rnams so/ /de ltar na 'phags lugs la rtsa rgyud le'u bcu bdun pa dang / ye shes rdo rje kun las btus/ dgongs pa lung ston/ lha mo bzhis zhus/ rdo rje phreng ba ste rtsa bshad kyi rgyud lnga po 'di ni med du mi rung gi rgyud yin te/ rgyud lnga po de dag gang rung zhig ma tshang na yang 'chad thabs kyi man ngag mtha' drug dang / tshul bzhi'i 'chad tshul sogs dang / bskyed rdzogs kyi nyams len rnams la tshang bar mi thon pa'i phyir/ de yang ye shes rdo rje kun las btus pa dang / dgongs pa lung ston gnyis ni gsang 'dus kyi thun mong ma yin pa'i bshad rgyud yin la/ lha mo bzhis zhus dang / rdo rje 'phreng ba gnyis ni rgyud sde gzhan dang thun mong ba'i bshad rgyud yin te/ dang po ye shes rdo rje kun las btus kyis mtha' drug dang tshul bzhi sogs rtsa rgyud kyi don gyi cha ston/ dgongs pa lung ston gyis tshig gi cha gtso bor ston/ rdo rje 'phreng bas bde mchog dril bu pa'i lus dkyil dang / yul nyi shu rtsa bzhi'i rtsa khams sogs bshad pas bde mchog dang thun mong ba/ lha mo bzhis zhus ni sambu Ti dang thun mong ba yin pas ma rgyud spyi'i bshad rgyud du 'gro ba'i phyir/ de ltar med kha med kyi rgyud lnga po de dag yin kyang / paN chen nyi zla ye shes sengge sogs phyis kyi mkhas pa 'ga' zhig gis rgyud phyi ma yang 'phags lugs la gsang ba 'dus pa'i rgyud du khas len dgos te/ de gnyis slob dpon sangs rgyas ye shes zhabs kyis gsang ba 'dus pa'i med kha med kyi rgyud du bzhed/ 'phags pa yab sras kyis kyang de