[A:87b]der skabs rje mus chen nyid kyang ngam ring na bzhugs so zhes thos byung bas bdag gi bsam pa la da lta gangs can gyi khrod na dge ba'i bshes gnyen thos bsam sgom gsum mthar phyin nas/ mkhas btsun bzang gsum gyi yon tan ma lus pa'i mnga' bdag tu gyur cing / lhag par dad ldan gyi slob bu la mchog dang thun mong gi dngos grub bde blag tu stsol zhing / mngon par mkhyen pa thogs med du mnga' ba'i skyes bu rje mus chen kho na las gzhan med do zhes dpyod ldan gzur gnas mang po'i ngag las thos shing / rang yang snying nas yid ches pa la brten/ da ni kho bo cag 'di phyi bar do gsum gyi skyabs gnas dang 'dren pa zhu ba'i blo rtse'i gtad mtshams kyi yul sngar gyi bla ma 'jam pa'i dbyangs sku mched zhal rnam pa gnyis dang / rje bla ma 'di kho na las gzhan med par rtogs nas bka' drin can gyi ma gcig lha sras bsod nams rgyal mo brgyud pa'i bdag gis rje 'di la zhu yig phul ba'i don 'bras la/ bdag tshe ha cang mi ring ba zhig byung na thos bsam rgya cher byas pa la don mi 'dug pas tshe ring thung 'ong dang / thog ma mdo sngags gang la sbyang na legs dang / dbu zhwa sogs sku dreg phog nges pa'i na bza' zhig byin rlabs rten du gnang ba dang / sems la phan pa'i gsung mgur bslab ston zhig gnang dgos zhus pas/ de'i lan du thugs dam gsung shog 'di bzhin gnang byung ste/ 'jam dbyangs ngag dbang kun dga' bsod nams grags pa rgyal mtshan dpal bzang po'i zhabs drung du zhu ba/ sku gsung thugs rab tu dwangs shing dkar phyogs dge ba la mngon par brtson pa'i skabs/ thugs dam bka' shog