[A:91a]dag gsal snyan pa'i sgo nas nyin rang po chos kyi grwar bzhugs kyang skyo sun cung zad kyang mi skye ba'i ngang nas dpal gsang ba 'dus pa mi bskyod pa'i smin byed kyi dbang thog mar stsal zhing / de nas rim lnga 'gos lugs kyi khrid yig rje rdo rje 'chang yab sras kyi zung 'jug gsal ba dang / rje sems dpa' chen po'i gsung la mang mkhar ba brgyud 'dzin blo gros rgyal mtshan gyis zin bris su btab pa'i yi ge gnyis kyi steng nas/ dpal ldan gsang ba 'dus pa'i zab khrid smin rgyas su stsal te/ de'i rgyab rten du rgyud rgyud 'grel dang bcas pa dang / rgya bod kyi gzhung rnams kyi bshad pa dang lung gi tshogs kyang zhib par gnang ste/ rje btsun gang gi gsung gi bdud rtsi'i chu rgyun gyis bdag blo'i bum pa yongs su gang bar gyur te rab dga'i sa thob pa lta bu'i dga' bde'i dpal la rang gzhan kun 'khod par mdzad pa'i bka' drin stsal ba yin no/ /'o na gong du bstan pa'i sa lugs kyi dbang bka' gsar rnying gnyis mi 'dra ba'i khyad par ji lta bu zhe na/ bshad par bya ste/ dbang bka' gsar rnying gnyis gsang ba 'dus pa mi bskyod pa'i dbang bka' 'khrul med rnam par dag pa re yin pas/ don gyi ngo bo ni mi mthun pa med la/ 'on kyang skur byed cho ga'i gzhung tha dad par yin pa dang / bod 'dir srol 'byed snga phyi cung zad byung bas/ de gnyis la gsar rnying gi brda chad sa lugs nyid la grags pa ltar don la gnas pa yin pa las/ skur byed cho ga'i gzhung tha dad pa yin te/ snga ma ni klu sgrub kyis mdzad pa'i cho ga nyi shu pa la brten pa yin