[A:12b]yang slob dpon sangs rgyas ye shes zhabs de nyid kyis ye shes rdo rje kun las btus sogs bshad rgyud gong ma bzhi po de dag ma gzigs pa yang ma yin la/ rgyud rnam dag ma yin par bzhed pa yang min mod kyi/ lugs de rang gi gsang ba 'dus pa'i bskyed rim bsnyen sgrub yan lag bzhi/ rdzogs rim grol ba'i thig le dang / sbyor ba yan lag drug pa'i man ngag de thon pa la bshad rgyud de gnyis kyis chog cing / rtsa bshad kyi rgyud gsum po de dag gang rung zhig med na yang nyams len zab mo de dag mi thon pas/ bshad rgyud gnyis po de med na yang mi rung bar bzhed pa yin no/ /des na ye shes zhabs lugs pa dang / shanti pa sogs 'grel byed gzhan la thun mong ma yin pa'i bshad rgyud ye shes rdo rje kun las btus dang / dgongs pa lung ston gnyis med pas rtsa rgyud kyi bshad pa'i bying ma thon pa yin zhing / 'phags lugs rtsa rgyud kyi tshig don gyi bshad pa bying can thon pa/ 'phags pa klu sgrub la thun mong ma yin pa'i bshad rgyud de dag mkha' 'gro mas lung bstan pa la brten nas byung ba yin par bshad pa yin no/ /de rnams kyis 'dus pa'i rgyud ston pas ji ltar gsungs pa'i tshul bstan zin nas// ! //spyi don gnyis pa 'dus pa la rgya bod du bshad srol ji ltar byung ba'i tshul la gnyis te/ 'phags yul du ji ltar byung ba'i tshul dang / bod yul du ji ltar byung ba'i tshul lo/ /dang po ni/ 'o na gsang ba 'dus pa'i rtsa bshad kyi rgyud de dag la brten pa'i lam srol ji tsam zhig rgya gar 'phags pa'i yul du byung ba yin zhe na/ dpal gsang ba 'dus pa 'di la rgya gar 'phags pa'i yul du srol chen bdun