[A:19a] rdzogs rim rim pa lnga pa'i man ngag ste smin grol cha tshang la ma nor ba'i gsang ba 'dus pa'i lam srol 'di phye bas 'di la gsang 'dus 'phags lugs su grags shing lugs 'di nyid gtso bo lta bu yin par bshad do/ /kha cig gis yab sras lnga po de dag 'phags pa'i gang zag yin pas/ de dag gis bkral ba'i lam srol la gsang 'dus 'phags lugs zhes grags so gsungs pa ni mi rigs te/ de ltar na ye shes zhabs lugs la yang 'phags lugs zhes brjod dgos te/ slob dpon de nyid 'phags pa'i gang zag yin zhing / des bkral ba'i lam srol yin pas so/ /des na 'khor lo bde mchog lU nag dril gsum ltar lugs srol de nyid bkral mkhan gyi grub chen gyi mtshan gyi sgo nas chos la mtshan de dang der thogs pa yin te/ 'phags pa klu sgrub kyi mtshan gyi sgo nas de'i bkral ba'i gsang 'dus kyi lam srol la gsang 'dus 'phags lugs dang / slob dpon sangs rgyas ye shes zhabs kyi mtshan gyi sgo nas de'i bkral ba'i gsang 'dus kyi lam srol la gsang 'dus ye shes zhabs lugs sogs kyi mtshan grags pa yin par shes dgos so/ /lam srol gnyis pa ni/ rtsa rgyud le'u bcu bdun pa dang / de'i rgyud phyi ma dang / rdo rje snying po rgyan gyi rgyud gnyis bshad rgyud du sbyar nas/ rtsa bshad kyi rgyud gsum po de la brten nas slob dpon sangs rgyas ye shes zhabs kyi mgon po 'jam pa'i dbyangs kyi lung bstan pa ltar gzhung bcu bzhi mdzad cing legs par