[A:23a]rab gsal la gsang 'dus 'phags lugs gnang yang de nyid las brgyud pa deng sang mi bzhugs/ yang jo bos lha btsun byang chub 'od la gsang 'dus 'jam rdor gyi dkyil 'khor la spyan ras gzigs dbus su go 'pho ba'i gsang 'dus spyan ras gzigs lha bcu dgu'i dbang gnang zhing / de nas brgyud pa'i dbang de deng sang yang ma nyams par bzhugs so/ /gsang 'dus spyan ras gzigs 'di yang slob dpon shanti pas gsang 'dus kyi 'grel par/ gal te rgyal gzhan dbus mar bzhag /de yi rigs kyi dkyil 'khor yin/ /zhes 'byung ba ltar/ ye shes zhabs lugs pas 'jam dbyangs dbus su bzhag nas/ 'jam dbyangs kyi rigs bdag mi bskyod pa de yar btegs pa'i dkyil 'khor de mi bskyod pa'i dkyil 'khor du 'jog pa ltar/ jo bo'i lugs la spyan ras gzigs dbus su bzhag dbus kyi mi bskyod pa nub kyi 'od dpag med kyi gnas su bzhag 'od dpag med spyan ras gzigs kyi rigs bdag tu yar btegs pas dkyil 'khor de yang spyan ras gzigs kyi rigs bdag 'od dpag med kyi dkyil 'khor du 'gyur bar gsungs pa yin no/ /lha bcu dgu'i dkyil 'khor de yang gsang ba 'dus pa rtsa rgyud kyi dngos bstan la rigs lnga yum bzhi khro bo bzhi ste bcu gsum las med kyang / gleng gzhi nas 'byung ba'i rdo rje ma drug bsnan pa la bzhed pa yin la/ de'i tshe rigs lnga ma tshang bar 'gyur ba'am rigs lnga tshang yang 'khor gyi lhas gtso bo'i sa bzung bas gtso 'khor go log pa'i nyes pa mi 'byung