[A:3b]yod par gsungs shing / de dag gi nang nas kyang rnal 'byor bla med nyid gtso bo yin la/ de la yang pha rgyud ma rgyud gnyis su gsungs pa yin te/ skyes pa rnams ni rjes gzung phyir/ /rnal 'byor pha yi rgyud ces bshad/ /bud med rnams ni rjes bzung phyir/ /rnal 'byor ma yi rgyud bshad do/ /zhes gsungs pas so/ /'o na khyad par gang gis pha rgyud dang ma rgyud du 'jog pa yin snyam na/ 'di la bla ma gong ma 'ga' zhig gis skyes pa 'dul ba'i don du gsungs pa dang / phos zhus pa de pha rgyud/ bud med 'dul ba'i don du gsungs pa dang / mos zhus pa de ma rgyud yin gsungs pa dang / yang kha cig dur khrod yod med dang / rdzogs rim la rlung ston pa dang / 'od gsal dang zung 'jug ston pa de pha rgyud/ rtsa thig dang dga' ba bzhi ston pa de ma rgyud yin zhes gsungs pa sogs mang du yod kyang / de dag gis ni phyogs re tsam mtshon nus kyi/ khyad par 'byed byed kyi gtso bo ni ma yin no/ /'o na ci zhe na grub chen nag po pas/ bskyed dang rdzogs 'byung dbye ba yis/ /rnal 'byor pha dang rnal 'byor ma/ /bskyed pa rnal 'byor pha zhes bya/ /rdzogs pa rnal 'byor ma zhes grags/ /zhes gsungs pas na bskyed rim rgyas par dngos su ston cing rdzogs rim shugs la ston pa de pha rgyud dang / rdzogs rim rgyas pa dngos su ston cing bskyed rim zhar byung lta bur ston pa de ma rgyud du 'jog pa yin no/ /des na pha rgyud 'di ma rgyud las khyad par du 'phags pa yin te/ ma rgyud pa'i gdul bya ni dbang po rtul po dbang dus kyi nyams myong gi rgyun de nyid goms par byed pa tsam yin la/ pha rgyud pa'i