[A:4a]gdul bya de lam zab pa dang rgya che ba la mos shing / ma rgyud pa'i lam gyi gtso bo gtum mo'i rnal 'byor ni/ pha rgyud pa'i ngag dben rdor bzlas kyi skabs su tshang zhing / phyag rgya la brten pa dbang gsum pa'i lam dga' ba bzhi'i ye shes 'dren par byed pa ni/ pha rgyud pa'i sems dben las kyi phyag rgya la bsten pa dang / chags lam du mtshungs pas sems dben kyi skabs su dga' ba bzhi'i ye shes tshangs shing / de'i steng du yang sgyu lus 'od gsal zung 'jug sogs pha rgyud la lhag por yod pa'i phyir ro zhes rje 'gos lo tsA bas bshad pa yin no/ /de ltar bla med kyi rgyud thams cad bsdu na ni pha rgyud dang ma rgyud gnyis su 'du ba dang / gnyis po der yod mod kyang / rgyud kyi dgongs pa mthar thug nges don du ni/ bla med kyi rgyud thams cad thabs shes gnyis su med pa'i rgyud yin te/ dges rdor gyi rgyud rgyas pa 'bum phrag lnga pa'i lung rdo rje snying 'grel du drangs pa las/ gang du thabs ni kun spyod cing / /shes rab gnas par gyur pa ni/ /kun rdzob rnal 'byor pha rgyud du/ /gang yin de ni nga yis bshad/ /gang du shes rab kun spyod cing / /thabs ni gnas par gyur pa ni/ /kun rdzob rnal 'byor ma rgyud du/ /gang yin de ni nga yis bshad/ /kyai rdor gyi ni phyogs gcig min/ /don gyi 'dus pa la sogs pa/ /shes rab thabs kyi bdag nyid do/ /zhes dang / dur khrod 'grel pa ye shes le'ur yang / rnal 'byor ma dang rnal 'byor gyi rgyud ces pas te/ kun rdzob kyi gang du rnal 'byor ma rnams yang dag par rgyu zhing thabs mi g.yo ba de ni rnal 'byor ma'i rgyud