[A:91a]zhag bdun na gdugs dang / Da ma ru'i sgra dang bcas rten la 'jug tu byung bar grags so/ /yang 'ga' zhig las/ de nas gzhan du sku 'khrungs pa na yang / bla mas ma gnang bzhin du spyod pa mdzad pa dang / mkha' 'gro'i bar chad kyis sku 'gyur ba sogs dran te/ da ni spyod pa'i dus la bab pa na lus la rus pa'i rgyan drug rang chas su shog cig ces smon lam btab nas/ rdo rje theg pa'i bsgrub pa mdzad pas dus la bab pa na rgyan rang chas su byung nas/ spyod pa mdzad pas sangs rgyas so zhes 'byung yang / bar dor 'bras bu mngon du byed par he ru kas lung bstan pa dang 'gal bas ma dag par bshad cing / bar dor mngon par sangs rgyas pa nyid yin te/ rdo rje gdan pas/ bla ma'i bka' bcag spyod pa mdzad/ /srid pa bar dor rdzogs sangs rgyas/ /nag po spyod pa zhes bya ba'i/ /bla ma de la phyag 'tshal lo/ /zhes pa ltar ro/ /de lta bu'i slob dpon chen po de la slob ma'i mchog rgyal po zla ba'i rol pa/ blon po dge ba'i mgon po/ slob dpon gu hya pa dang gsum las/ brgyud pa 'dzin pa ni phyi ma ste/ 'dis ni sngar slob dpon nag po spyod pa la bar chad byed pa'i mkha' 'gro ma de dag kyang legs par btul zhing / phyag rgya chen po'i dngos grub brnyes pa zhig yin la/ de'i slob ma bi dza ya ste/ bod skad du rnam par rgyal ba zhes pa yin la/ des kyang phyag rgya chen po'i dngos grub thob bo/ /yang bde mchog lU hi pa'i chos skor gyi brgyud pa ltar na/ dha ri ka pa'i slob