[A:96a]chen po mchog gi dngos grub thob pa'i skal ba med kyis chos ston cig 'gro ba mang po la phan/ khyod bas kyang slob ma dang / yang slob rim pas phan che cher 'gyur zhing / bar dor phyag rgya chen po'i dngos grub thob par 'gyur ro gsungs mi snang bar gyur to/ /de nas na ro pas bshad sgrub gnyis ka mdzad pas rtogs pa cher 'khrungs te/ 'char ba med cing nub pa'ang med/ /nyin mo med cing mtshan mo'ang med/ /bla mas rtogs pas rmongs pa bcad de song / /gar 'gro gang du gnas pa ma shes te/ /bde chen gyis ni dbang po'i grong 'di bcom/ /bsam du med pa'i rnal 'byor de las skyes/ /de las bdag gis ci zhig bsam par bya/ /phyogs rnams stong zhing rang yang rnam par grol/ /gang bltas de ni rtag tu de yin te/ /gnyug ma'i yid ni gdod nas stong par go /rgyu dang 'bras bu btang snyoms dag tu dor/ /'di yi khyad par ti lo pa dpang ngo / /zhes gsungs so/ /de lta bu'i slob dpon des tshe 'dir phyag rgya chen po'i dngos grub mngon du ma gyur kyang / rgyal po dpung dang bcas pa rengs par byed pa dang / tshogs 'khor sogs kyi dus su shing thog sogs dgug nus pa dang / sbyin sreg gi thab khung nang du lha sum cu rtsa bdun gyi zhal blta nus pa la sogs pa ting nge 'dzin gyi rtogs pa brtan pas spur sbyangs pa'i shul du yang zla ba re re bzhin du rol mo'i sgra dang me tog gi char la sogs pa lha'i mchod pa'i bye brag mang po kun gyis mthong zhing thos pa 'byung ba yin no/ /de la