[A:6a]grub mchod mdzad/ mtshan mo rje nyid sku rkyang las med pas/ bla ma 'di gshegs pas kho bo gcig pu mgon dang bral ba yin par 'dug dgongs nas shum zhing / sku gdung la dbu gtugs nas gdung gi drung du kyai rdor rgyud gsum brgya tshar gcig zhal 'don mdzad pa la sogs pa'i sgo nas gsol ba drag tu btab pas thugs rab kyi mtsho rdol te gsung rab thams cad la mi 'jigs pa'i spobs pa brnyes pa yin zhes thos so/ /slar yang bla ma dam pa 'di nyid kyi dam chos 'tshol ba la ngom pa med par 'phags pa 'jig rten dbang phyug gi rnam 'phrul mus chen sems dpa' chen po sangs rgyas rin chen dpal bzang po'i zhabs la gtugs te/ lo ngo brgyad kyi bar du lus dang grib ma ltar 'grogs nas/ dpal e waM chos ldan dang / mus rta mo gling dga' sogs gang bzhugs su chos kyi 'khor lo bskor ba rnams dam pa 'di nyid dam pa'i chos kyi snod du gzigs nas bu gcig pa la brtse ba'i ma ltar thugs brtse ba chen pos rjes su bzung ste/ bka' chos bsam gyis mi khyab pa bka' drin bskyangs pa yin la/ ngor du bzhugs skabs rje btsun sangs rgyas rin chen pa'i gsol lhung gsol ba dang bcas pa gnang ste/ khyed 'dir bsdod rtag par gyis shig khyed la dgon pa 'dir 'phrin las chen po zhig yong ba yin no gsungs te/ khyab bdag rdo rje 'chang chen po'i rgyal tshab tu lung bstan pa dang / rta mo gling dgar yun ring bzhugs pa'i skabs/ de