[A:7a]bshes gnyen pa la sogs pa kha skong bar 'os pa'i dge slong du ma dang bcas pa'i dbus su/ dgung lo nyi shu bzhes pa 'dzin byed ces pa me pho byi ba'i lo sa ga zla ba'i yar tshes bcu gsum gyi nyi ma phyed yol dus su/ yon tan rin po che du ma'i 'byung gnas dpal e waM chos ldan gyi gzim khang g.yab chen du dge slong gi sdom pa legs par thob pa yin no/ /skyes bu dam pa 'di bsnyen par rdzogs pas sangs rgyas kyi bstan pa dang / dkar phyogs kyi lha rnams ni zla ba yar gyi ngo bzhin 'phel bar 'gyur la/ nag po'i phyogs dang / lha ma yin rnams 'grib par 'gyur te/ snyan pa'i grags pa sa steng khyab par gyur to/ /de nas bzung ste tshul khrims kyi phung po mig gi 'bras bu ltar gces par bzung nas sha chang sgog pa gsum la sogs pa bslab par bya ba'i cha phra zhing phra ba rnams kyang spangs blangs tshul bzhin mdzad de/ de yang gzhan rkyen gyis bsgrub pa la mi ltos par/ sngon gyi bag chags bzang po'i stobs kyis sku gsung thugs kyi dbang po zhi zhing dul ba dang / spyod lam thams cad bag yod kyi kun spyod dang ldan zhing / tshul khrims kyi dri bzang gis sa steng ma lus pa khyab par bzhugs pa yin no/ /zhes thos so/ yang 'dren pa dam pa 'di nyid kyi rje thams cad mkhyen pa glo bo mkhan chen bsod nams lhun grub pa'i drung du chos gsan par phebs tshul ni/ spyir rje thams cad mkhyen pa 'di nyid mkhas grub mtshungs