[A:13a]rtsa dang gnyer ma la sogs pa mi mngon zhing rin po che byi dor byas pa ltar gtsang zhing yongs su dag la gzi 'od 'bar ba dang / zla ba dri ma med pa ltar shin tu dkar zhing dwangs la 'od zer 'phro bar bzhugs pas/ sku mthong ba tsam gyis dad pa rang dbang med par 'byung ba yin la/ dgung lo drug cu re gcig bzhes pa'i tshe yang sku'i cha shas gang na yang gnyer ma spu nyag tsam yod pa sus kyang ma mthong ba ni dus mtshungs pa'i skye bo zhabs drung na gnas pa kun gyis mngon sum du grub pa dang / sku mya ngan la 'da' khar gsang gnas 'dom gyi sba ba dang bcas pa sbugs su nub pa la sogs pa sangs rgyas kyi mtshan dpe dang dngos su ldan pa 'di ni/ bdag nyid chen po sa skya paN chen mya ngan las 'das pa'i 'og tu/ kha ba can gyi khrod 'dir 'dren mchog dam pa 'di nyid las gzhan ma byung ba yin no/ /gzhan yang sngon sku tshe dpag tu med pa nas sbyangs pa'i stobs kyis rig gnas mtha' dag dang / mkhas btsun bzang gsum dang mchod rtsod rtsom gsum rnams la sku tshe 'dir sbyangs tshul dang / gsal 'debs tsam mdzad pa de thams cad la mi 'jigs pa'i spobs pa thob pa yin te/ nyid kyi zhal nas/ rnam mang shes bya'i ri mo ngo mtshar ba/ /rnam dpyod dngul dkar dwangs pa'i me long du/ /rnam dkar tshogs gnyis dbang gis legs shar ba'i/ /rnam mkhyen 'dren pa mchog la gsol ba 'debs/ /zhes dang / sngon tshe goms pa'i