[A:18a]pa kho nas dus 'da' bar mdzad pa dang / gzhan yang bstan pa stobs kyis 'dzin pa'i mi dbang chen po rin chen dbang gi rgyal po sku mched dang / rgya ma khri dpon/ grwa lnga rgyal po dang / dpal rnam sde pa/ hor tshe brtan don 'grub/ rnar thang sde pa don grub rdo rje la sogs pa rigs rus phun sum tshogs pa'i skyes bu 'byor pa dang ldan pa mtha' dag gis dam pa nyid kyi zhabs pad spyi bor blangs te rnyed pa dang bkur bsti chen pos mchod nas mnyes par byas te/ chos kyi 'khor lo bskor bar gsol ba btab pas rang rang blo dang 'tshams pa'i dam pa'i chos zab mo mang du gnang ste skal ba dang ldan par mdzad pa yin no/ /khyad par bdag nyid chen po 'dis ni dben pa la thugs gzhol ba dang / bstan pa'i bya ba 'chad rtsod rtsom gsum gyis dus 'da' bar mdzad pa ma gtogs/ che 'dod dang grags 'dod sogs 'jig rten chos brgyad kyi dri ma mi mnga' yang / sde 'khrug la sogs pa las ngan can gyi sems can rnams sdug bsngal drag pos nye bar gdung pa'i tshe/ me pho 'brug gi lo bdag chen rin po che kun dga' rin chen pa dang / chos rgyal nam mkha' tshe dbang rdo rje gnyis kyis gsol ba nan can btab pa la rten pa bla ma dam pa 'di nyid la mkhyen brtse nus gsum gyi yon tan phul du phyin pa mnga' ba'i stobs kyis lugs gnyis la rten pa'i bka'i bdud rtsi legs par phebs pas sde srid tha dad nas sgo gsum gyi dbang po tshim ste/ bla ma dam pa 'di'i bka'