[A:༥༤བ]བཤད། གནད་ཀྱི་གསལ་བྱེད་ལས། གསང་བ་ལ་ནི་ས་ཡི་ཁམས། །ཞེས་པ་ནས་བརྩམས་ཏེ། ཆོས་ཀྱི་སྐུར་ནི་རབ་ཏུ་གྲགས། །ཞེས་པའི་བར་གྱིས་རང་བྱུང་གི་ཡེ་ཤེས་ཀྱི་མཚན་ཉིད་སྟོན་པ་ལས། དེ་ལ་རྒྱས་པར་བསྟན་པ་དང་། ཤིན་ཏུ་བསྡུས་ཏེ་བསྟན་པའོ། །དང་པོ་ལ་གསུམ། རྟེན་ཞུ་བ་ལ་འབྱུང་བ་ལྔར་བསྟན། བརྟེན་པ་མེད་པ་བདེ་བ་ཡེ་ཤེས་ལྔར་བསྟན། དེ་ཉིད་རིགས་ལྔར་བསྟན་པ་ཞེས་གསུངས་པའི་རིགས་ལྔར་བསྟན་པའི་སྐབས་སུ། ཤིན་ཏུ་རྣམ་དག་ཡེ་ཤེས་ཆེ། །རྡོ་རྗེ་སེམས་དཔའ་ཞེས་བྱར་བཤད། །ཅེས་པའི་ཚིག་རྐང་གཉིས་སྡེབས་ཏེ། མི་བསྐྱོད་པ་དང་རྡོ་རྗེ་སེམས་དཔའ་གཉིས་ཀས་ཕྱོགས་གཅིག་ཏུ་ཐམས་ཅད་བདག་ཉིད་ཀྱིས་སྟོན་པའི་གཞུང་ཡིན་པས་དེ་ནི་རྒྱས་པར་བསྟན་པའི་སྐབས་ཡིན་ལ། བདེ་བ་དམ་པ་རུ་ནི་བརྗོད། །ཞེས་པ་ནི་བསྡུས་ཏེ་བསྟན་པ་ལ་རྟེན་ཐིག་ལེ་བསྡུས་ཏེ་བསྟན་པ་དང་། བརྟེན་པ་བདེ་སྟོང་བསྡུས་ཏེ་བསྟན་པ་ཡིན་པར་གསུངས་པས། གཞུང་མཚམས་ཀྱང་ཐ་དད་ཅིང་། རིགས་བདག་གིས་རྒྱས་གདབ་སྟོན་པར་དོགས་པའི་གནས་ཙམ་ཡང་མེད་ལ། རང་བློས་སྦྱར་བས་རྗེ་བཙུན་གོང་མའི་ལུགས་སུ་འགྱུར་རམ། སློབ་དཔོན་དགྲ་ལས་རྣམ་རྒྱལ་གྱི་གཞུང་ཡང་། ཕོ་བྲང་དྲུག་པ་སྟོན་པའི་གཞུང་ཡིན་གྱི། རིགས་བདག་གིས་རྒྱས་འདེབས་སྟོན་པའི་གཞུང་མ་ཡིན་ཏེ་གཞུང་གི་སྐབས་ལ་དཔྱད་པས་ཤེས་ཡིན་ནོ། །དེ་ལྟར་ན་བསྒྲུབ་བྱེད་རྣམ་པར་དག་པ་མེད་བཞིན་དུ་རྗེ་བཙུན་གྱི་གསུང་རྣམས་དོར་ནས་གཞན་དུ་སྨྲ་བ་འདི་ལ་དགོས་པ་ཅི་ཞིག་ཡོད། འོ་ན་རྗེ་བཙུན་གོང་མའི་གཞུང་ལས་ཇི་ལྟར་བཤད་ཅེ་ན། སྲས་དོན་མ་ལས། དབང་