[A:༥༦ན]དྲུག་པ་སྟོན་བྱེད་ཀྱི་ཀྱཻ་རྡོར་རྒྱུད་གསུམ་གྱི་ལུང་གསལ་ཁ་ཅན་ཞིག་བསྟན་དགོས་སོ། །དེས་ན་མཁྱེན་རབ་དབང་ཕྱུག་གིས། འདི་མཐའ་འདི་ཙམ་ཁོ་ནར་གནས་སོ་ཞེས། །དེ་མཐའ་དེ་ཙམ་ཁོ་ནར་རྗེས་དཔག་ན། །འགྲོ་བའི་བླ་མའི་གསུང་ལས་བརྒལ་བ་སྟེ། །དེས་ན་མཐའ་མིན་དགོངས་པ་དཔྱད་པར་བྱ། །ཞེས་གསུངས་པ་འདི་བློ་ལ་ངེས་པར་གྱིས་ལ། གཅིག་བསྟན་ན་གཅིག་ཤོས་བསྟན་དུ་མི་རུང་ངོ་སྙམ་དུ་ད་ཕྱིན་ཆད་མ་སེམས་ཤིག གཉིས་པ་ནི། ཁྱོད་ཀྱིས་ཕྱག་རྒྱ་བཞི་པ་མ་མཐོང་བཞིན་དུ་དེའི་དོན་འཁོར་ལོ་དྲུག་པར་འཆད་པ་ནི་འོལ་སྤྱོད་ཆེས་པ་ཡིན་ཏེ། ཇི་སྐད་དུ་ཕྱག་རྒྱ་བཞི་པ་ལས། རྣལ་འབྱོར་ཆོས་མཆོག་རང་གི་ལུས། །གྲུབ་པའི་དཀྱིལ་འཁོར་སྐད་ཅིག་ལྟ། །ལྟེ་བ་དྲུག་ཅུ་རྩ་བཞིའི་རྩ། །ས་ཡི་རང་བཞིན་སྤྱན་མ་སེར། །ལས་ཀྱི་ཕྱག་རྒྱའོ། །སྙིང་ཁར་བརྒྱད་ཀྱི་རྩ་རྣམས་ལ། །རྡོ་རྗེ་བཙུན་མོ་མ་མཱ་ཀི །མདོག་སྔོན་གྲི་གུག་ཐོད་པ་འཛིན། །གར་གྱིས་ལེགས་རོལ་ཆུ་ཡི་ཁམས། །ཆོས་ཀྱི་ཕྱག་རྒྱའོ། །མགྲིན་པར་འཁོར་ལོ་ལོངས་སྤྱོད་ཆེ། །བཅུ་དྲུག་རྩ་ལས་གོས་དཀར་མོ། །མེ་ཁམས་རྣམ་དག་ཁ་དོག་དམར། །ཞལ་གཅིག་ཕྱག་གཉིས་མཛེས་པ་མ། །ཕྱག་རྒྱ་ཆེན་པོའོ། །གསང་བར་པདྨ་སུམ་ཅུ་གཉིས། །སྒྲོལ་མ་ལྗང་སྔོ་རླུང་གི་ཁམས། །སྟེང་གི་བདེ་ཆེན་འཁོར་ལོ་ལ། །རྡོ་རྗེ་དབྱིངས་ཀྱི་དབང་ཕྱུག་མ། །སུམ་ཅུ་གཉིས་ལྡན་ཁ་དོག་དཀར། །བདེ་ཆེན་ནམ་མཁའ་ཉིད་དུ་མཛོད། །དམ་ཚིག་གི་ཕྱག་རྒྱའོ། །རྣམ་སྣང་ལ་སོགས་སངས་རྒྱས་རྣམས། །འཁོར་ལོའི་དབུས་སུ་རོལ་ཞིང་གནས། །ཞལ་མདོག་མཚན་མ་ལ་