[A:༧༢ན]རང་གི་གཙོ་བོ། སྐྱེ་མཆེད་ཀྱི་ལྷ་རྣམས་ལ་རང་རང་གི་ཁ་དོག་དང་མཐུན་པའི་རིགས་བདག ཁྲོ་བོ་བཅུ་ལ་སྲུང་འཁོར་གྱི་སྐབས་ནས་འབྱུང་བ་བཞིན་རིགས་ཀྱི་བདག་པོས་དབུར་བརྒྱན་པར་བསམ་མོ། །ཞེས་གསུངས་པ་ཡིན་ནོ། །འོ་ན་བཤད་པ་གཉིས་པོ་མ་མཐུན་པའམ། འཕགས་པས་གསུངས་པ་དེ་མི་འཐད་དོ་ཞེ་ན། མི་མཐུན་པར་སྣང་བ་འདི་བརྒྱུད་པའི་མན་ངག་མེད་པར་ཡི་གེ་ལ་ཐུག་འཕྲད་བྱས་པས་སྨྲ་བ་སྟེ། འདིར་རྡོར་སེམས་ནི་རིགས་ལྔ་པོ་རང་རང་གི་རྒྱུ་རྡོ་རྗེ་འཛིན་པ་ཡིན་པས་རང་རང་གི་རིགས་ཀྱི་རྒྱས་གདབ་པ་ཡང་ཡིན་ལ་རྡོ་རྗེ་སེམས་དཔའི་རྒྱས་གདབ་པ་ཡང་ཡིན་པས་དོན་ཅིག་པ་ཡང་ཡིན་ནོ་ཞེས་སྨྲའོ། །དེའི་ལན་ནི།
ལུས་དཀྱིལ་ལྷ་ལ་རྡོར་སེམས་ཀྱི། །རིགས་བདག་བཤད་པ་དེ་ནོར་ན། །འཕགས་པས་ལུས་དཀྱིལ་གཙོ་བོ་ལ། །རྡོར་སེམས་རིགས་བདག་བཤད་པ་དེ། །རྣམ་པ་ཀུན་དུ་དོར་དགོས་སོ། །གལ་ཏེ་འཕགས་པས་བཤད་པ་དེ། །རྡོར་སེམས་རིགས་བདག་རིགས་ལྔ་ཡི། །རྒྱུ་ཡི་རྡོར་འཛིན་ཡིན་པའི་ཕྱིར། །དེ་ལ་འགལ་བ་མེད་ཅེས་སྨྲ། །དེ་ལྟ་ན་ནི་ལྷ་ཀུན་གྱི། །རིགས་བདག་རིགས་ལྔའི་རྒྱུ་རྡོར་འཛིན། །རྡོ་རྗེ་སེམས་དཔའ་ཡིན་པའི་ཕྱིར། །གཙོ་འཁོར་ཀུན་ལ་རྡོར་སེམས་ཀྱིས། །རྒྱས་འདེབས་བྱེད་པ་གྲུབ་པའི་ཕྱིར། །སྐབས་ཀྱི་རྩོད་པ་སྤྲིན་བཞིན་དེངས། །དགོས་མེད་རྩོད་པ་མྱོས་བྱེད་ཀྱི། །དྲེགས་པ་ཀུན་གྱི་བྱེད་ལས་ཡིན། །ཕྱག་རྒྱ་བཞི་པའི་དངོས་བསྟན་དེ། །ཕོ་བྲང་དྲུག་པར་ཁྱེད་འདོད་ན། །ཕོ་བྲང་ལྔ་ལ་རྩ་འདབ་དང་། །འཁོར་སོགས་བཤད་ནས་དྲུག་པ་ལ། །དེ་དག་མི་འབྱུང་བ་དེ་ཅི། །སྤྱི་གཙུག་འཁོར་ལོ་ཞེས་པ་དེ། །ཕྱག་རྒྱ་བཞི་པོ་གང་དུ་འདུས། །ཕྱག་རྒྱ་བཞི་རུ་མ་འདུས་པའི། །ཕྱག་རྒྱ་བཞི་པ་གད་མོའི་གནས། །འཁོར་ལོ་བསྒྱུར་བ་དྲུག་ཡོད་ན། །རྒྱལ་ཆེན་འཁོར་