[A:༧བ]ཡང་། །ལེགས་པར་ཐོབ་ཅེས་གསུངས་ཕྱིར་རོ། །དེས་ན་སྣང་བ་གསུམ་གྱི་སྔོན། །སྔོན་འགྲོ་དེ་རྣམས་འགྲོ་དགོས་ཕྱིར། །ཐོག་མར་དབང་བསྐུར་བྱེད་གྲུབ་ཅིང་། །ཁྱད་པར་སྣང་བ་གསུམ་གྱི་སྔོན། །བླ་མ་དམ་པའི་ཞབས་བཏུད་དེ། །ཞེས་པས་རྒྱུ་ཡི་དབང་བསྟན་པར། །ཐམས་ཅད་མཁྱེན་པ་ཆོས་ཀྱི་རྗེས། །དབང་མ་བསྐུར་ལ་བླ་མ་མེད། །ཅེས་པའི་འགྲེལ་གྱི་ཤེས་པའི་ཚུལ། །རྒྱས་བཤད་རྣམ་འགྲེལ་རྣམས་སུ་ཡང་། །ཕྱི་ནང་གསང་བ་མཐར་ཐུག་གི །བླ་མ་བཞི་ཡི་ལུས་སོགས་ལ། །དབང་བཞི་བསྐུར་ནས་དབྱིབས་སོགས་ཀྱི། །ལམ་བཞི་བསྒོམ་པས་སྐུ་བཞི་ནི། །འགྲུབ་པར་གསུངས་ན་དེ་ཡི་སྔོན། །དབང་མ་བསྐུར་བར་དེ་དག་གི །བཤད་པ་འབྱུང་བ་ཇི་ལྟར་ལགས། །རང་གི་བརྒྱུད་པའི་བླ་མ་སོགས། །རྗེ་བཙུན་དམ་པ་དེ་རྣམས་ཀྱི། །གསུང་ལ་ཚད་མར་མི་བྱེད་པར། །རང་བཟོས་གྱ་ཚོམ་སྨྲས་པ་ལ། །ཡིད་བརྟན་རུང་ངམ་ཤེས་ལྡན་དག །གཞན་ཡང་ཁྱེད་རྣམས་ལ་ལ་དག །ཁྲིད་ཀྱི་དཀར་ཆག་ས་པཎ་གྱིས། །མཛད་པ་མིན་ཏེ་ལྕང་ར་བ། །ཀུན་དགའ་རྒྱལ་མཚན་བྱས་སོ་ཞེས། །མངོན་སུམ་འཁྱོག་པོར་སྨྲ་མོད་ཀྱི། །དེས་ན་གསན་ཡིག་རྒྱ་མཚོ་རུ། །ཁྲིད་ཀྱི་དཀར་ཆག་ས་པཎ་གྱིས། །མཛད་པ་ཐོབ་པའི་བརྒྱུད་པ་ནི། །ཆོས་རྗེ་ཉིད་དང་ལོང་བུ་བ། །ཞེས་སོགས་ཡོད་ན་ཇི་སྐད་སྨྲ། །གཞན་ཡང་སྐལ་ལྡན་གཅིག་ཅར་ལ། །སྣང་གསུམ་ངེས་པར་མི་དགོས་པའི། །ཤུགས་ལ་སྐལ་དམན་རིམ་གྱིས་ལ། །ངེས་པར་དགོས་པར་ཁས་བླང་པས། །རིམ་འཇུག་ལམ་རིམ་ཐམས་ཅད་ལ། །སྣང་གསུམ་ཡོད་པས་ཁྱབ་ལགས་སམ། །རིམ་གྱིས་འཇུག་ལ་སྐྱོན་