[A:༩༥ན]ནི། སམྦུ་ཊི་ལས། སློབ་མས་པུས་མོའི་ལྷ་ང་ནི། །ས་ལ་དད་པས་བཙུགས་ནས་ནི། །ཐལ་མོ་སྦྱར་ནས་བསྟོད་པ་ཡིས། །སྟོན་པ་ལ་ནི་ཞུ་བར་བྱ། །ཞེས་དང་། དེ་ལྟར་ཆོ་ག་རྒྱུད་གསུམ་དུ་མི་གསལ་བ་རྣམས། ཇི་ལྟར་དེ་ཉིད་བསྡུས་པ་ཡིས། །དཀྱིལ་འཁོར་ཆོ་ག་དེ་བཞིན་བྱ། །ཞེས་བཤད་པ་དེ་ཉིད་བསྡུས་པ་དང་། གསང་བ་སྤྱི་རྒྱུད་ལས་རྟོགས་པར་བྱའོ། ཞེས་དང་། རྗེ་ས་པཎ་གྱིས། གང་དུ་ལས་ནི་ཡོད་གྱུར་ལ། །ལས་ཀྱི་ཆོ་ག་རྣམས་མེད་པ། །དེ་ནི་སྤྱི་ཡི་རྒྱུད་དག་ལས། །གསུངས་པའི་ཆོ་ག་མཁས་པས་བསྟེན། །ཅེས་སོགས་མཐའ་ཡས་པ་གསུངས་ལ། སྔར་ཁྱེད་ཀྱིས་དྲངས་པའི་རྣམ་སྣང་མངོན་བྱང་གི་ལུང་དེ་ནི་སྤྱོད་རྒྱུད་ཀྱི་ལུགས་ལ་གྲངས་ངེས་མི་དགོས་པའི་ཁུངས་ཡིན་ཞིང་། སྤྱི་རྒྱུད་ཀྱི་ལུང་ནི་རྒྱུད་སྡེ་གཞན་གསུམ་ལ་གྲངས་ངེས་དགོས་པའི་ལུང་ཡིན་ན། འདི་འདྲ་བའི་ལུང་སྦྱོར་ནི་ས་སྐྱ་པའི་རྗེས་སུ་འཇུག་བཞིན་དུ་རྒྱུད་སྡེ་ཕན་ཚུན་དཀྲུགས་པར་ཟད་དོ། །གཞན་ཡང་སྤྱི་རྒྱུད་ལས། སློབ་མ་རྗེས་སུ་བཟུང་བ་གང་། །སྟ་གོན་གནས་དེར་མེད་ན་ནི། །དེ་ཡི་གཟུགས་བརྙན་བྱས་ནས་ནི། །ཇི་སྐད་གསུངས་པའི་ལས་རྣམས་བྱ། །ཞེས་གསུངས་པ་ཉིད་ཀྱང་སློབ་མ་བརྒྱ་སྟོང་གྲངས་མེད་ལ་དུས་གཅིག་ཏུ་རྗེས་འཛིན་གྱི་ཆོ་ག་བྱེད་པ་བཀག་པ་ཡིན་ཏེ། དབང་བསྐུར་གྱི་གྲངས་ཁ་ཚང་བའི་ཕྱིར། རྗེས་བཟུང་ཚེའི་དུས་བྱས་པ་དེ་ཉིད་ཀྱི་རྟེན་ལ་ཆོ་ག་བྱ་དགོས་པ་བྱུང་བ་ཡིན་པས་སོ། །གཟུ་བོར་གནས་པའི་བློ་ལྡན་རྣམས་ཀྱིས་ལེགས་པར་དཔྱོད་ཅིག གཞན་ཡང་རིགས་སྔགས་མཁན་པོ་ན་རེ། ཆོས་རྗེ་བླ་མའི་བཞེད་པ་ཡིན་པར་བྱས་