[A:༡༣༡བ]བརྐྱངས་པ་དང་། གཡོན་བསྐུམ་པ་དང་། སྐྱིལ་ཀྲུང་ཕྱེད་པའི་དག་པ་གསུམ་པོ་སོ་སོར་གསུངས་པས། མདུན་མ་གཉིས་གཡས་བརྐྱང་ཞིང་གཡོན་བསྐུམ་པ་དང་། རྒྱབ་མ་གཉིས་སྐྱིལ་ཀྲུང་ཕྱེད་པའི་གར་སྟབས་བསྟན་ནོ་སྙམ་ན། དེ་ནི་མ་ཡིན་ཏེ། སྐྱིལ་ཀྲུང་ཕྱེད་པ་དེ་ཉིད་ལ་གཡས་བརྐྱངས་གཡོན་བསྐུམ་ཚངས་བས་དེའི་དག་པ་སྟོན་པ་ཡིན་པའི་ཕྱིར་ཏེ། མཚོ་སྐྱེས་ཀྱི་འགྲེལ་པར། དེ་དག་ཀྱང་མཉམ་པར་བརྩེགས་པའི་སྙིང་ཁར་ཞབས་གཡས་པ་གཉིས་ཀྱིས་མནན་པའོ། །རོལ་མོའི་ཚུལ་ནི་སྐྱིལ་ཀྲུང་ཕྱེད་པའོ། །དེའི་གཡས་བརྐྱངས་པ་ནི་ཐུགས་རྗེས་སེམས་ཅན་ལ་ཁྱབ་པའོ། །གཡོན་བསྐུམས་པ་ནི་ཤེས་རབ་ཀྱིས་ཆོས་གང་ཡང་མི་འཛིན་པར་བཏང་བའོ། །ཞེས་གསལ་བར་གསུངས་པའོ། །གཞན་དུ་ན་འཁོར་ལོ་བདེ་མཆོག་ལ་རྡོ་རྗེ་དང་དྲིལ་བུ་འཛིན་པའི་ཕྱག་གཉིས་ལས་གཞན་པའི་ཕྱག་གཉིས་ཀྱི་ཡུམ་ལ་འཁྱུད་དགོས་པར་འགྱུར་ཏེ། རྗེ་བཙུན་གྱིས་རྡོ་རྗེ་འཛིན་པ་དང་། དྲིལ་བུ་འཛིན་པ་དང་། ཡུམ་ལ་འཁྱུད་པའི་དག་པ་གསུམ་སོ་སོར་གསུངས་པའི་ཕྱིར་རོ། །འགྲེལ་པ་ལུགས་ཀྱི་གཞུང་རྣམས་ལས། གཡས་བརྐྱངས་ཞེས་པ་ཙམ་དང་། སྐྱིལ་ཀྲུང་ཕྱེད་པ་ཞེས་པ་ཙམ་ལས་གསལ་ཁ་མི་སྣང་ཡང་། རིན་ཆེན་འབར་བར། ཉི་མར་ཞབས་གཡས་བརྐྱངས་གཡོན་བསྐུམ། །ལྷག་མ་གར་གྱི་ཚུལ་གྱིས་བཞེངས། །ཞེས་གསུངས་པའི་དོན་ནི། མདུན་མ་གཉིས་གཡས་བརྐྱངས་གཡོན་བསྐུམ། རྒྱབ་མ་གཉིས་སྐྱིལ་ཀྲུང་ཕྱེད་པའི་གར་སྟབས་ཡིན་པར་མངོན་ཏེ། རྗེ་བཙུན་ཆེན་པོས་མཛད་པའི་གདན་གྱི་རྣམ་དག་ལས། གཙོ་བོའི་ཞབས་ཕྱེད་ཀྲུང་དུ་བཞུགས་པས་ཚངས་པའི་སྙིང་ཁ་