[A:༡༧བ]།བདེ་ཆེན་རྟེན་དང་བརྟེན་པར་བཅས་ཀུན་ལ། །ཁྱབ་མཛད་འཁོར་ལོའི་མགོན་དེར་ཕྱག་འཚལ་ལོ། །བརྒྱ་བྱིན་སྦྲང་རྩིའི་བདེ་ལ་མ་ཆགས་པར། །ཆགས་བྲལ་ཆོས་ཀྱི་བདེ་ལ་ཡིད་འདུན་བྱེད། །ཚངས་ཆེན་ཆགས་བྲལ་བདེ་བས་མ་ཁེངས་པར། །ཟག་མེད་བདེ་ཆེན་འཁོར་ལོ་བསྐོར་བ་བསྐུལ། །དེ་ཡང་འདིར་བདག་ཅག་གི་བླ་མ་དམ་པ། ཐུབ་པའི་དབང་པོའི་བསྟན་པ་མ་ལུས་པ་འཛིན་པའི་བདག་པོ། སོ་སོ་ཐར་པའི་རྩ་བ་ཚུགས་པར་བཟུང་བས། ཉན་ཐོས་ཀྱི་བསྟན་པ་བཙུན་པ་དང་། རྒྱལ་སྲས་ཀྱི་སྤྱོད་པ་རླབས་པོ་ཆེས་བྱང་ཆུབ་སེམས་དཔའི་བསྟན་པ་བཟང་པོར་མཛད་པ་དང་། མདོ་སྔགས་མ་ལུས་པ་ལ་ཤེས་རབ་ཀྱི་དབང་པོ་རྒྱས་པས། རྡོ་རྗེའི་ཐེག་པར་རྨོངས་པ་མཐའ་དག་སེལ་བ་ལ་མཁས་པ་དང་། ངོ་མཚར་ཅན་གྱི་མཛད་པ་རྨད་དུ་བྱུང་བས། བསྟན་པ་རིན་པོ་ཆེ་སྤྱི་དང་། ངོ་མཚར་ཅན་གྱི་བརྒྱུད་པ་སོ་སོའི་སྲོལ་མ་ཉམས་པ། ལྷག་ཆད་མེད་པར་བཟུང་ནས་མཐའ་ཡས་པའི་འགྲོ་བ་མཐའ་དག་སྐལ་བ་བཟང་པོར་མཛད་པ་དེ་ཉིད་ཀྱི་ཞལ་སྔ་ནས། རྗེ་བཙུན་རྣལ་འབྱོར་གྱི་དབང་ཕྱུག་བིརྺ་པས། ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་ཆེན་པོ་ལས་བརྙེས་པའི་གསུང་ངག་རྩ་བ་རྡོ་རྗེའི་ཚིག་རྐང་འགྲེལ་པ་དང་བཅས་པ་དག་གི་དགོངས་པ། ཆེས་ཤིན་ཏུ་ལས་དང་པོ་པར་གྱུར་པ་དག གོ་རིམ་ཇི་ལྟ་བ་བཞིན་དུ་ཐེག་པ་མཆོག་གི་རྩེ་མོ་ཉིད་དུ་ཁྲིད་པར་བྱེད་པའི་ཐབས་ཕུལ་དུ་བྱུང་བ། མདོ་སྔགས་མ་ལུས་པའི་ཡུལ་ཅན་ཉིད་དུ་མཛད་ནས། འདོམས་པའི་ཕྱག་ལེན་གྱི་སྲོལ་རྒྱ་མཚོ་ལྟ་བུའི་ནང་ནས། ཕྱོགས་རེ་བ་གང་དག་ཡིན་པ་དེ་དང་དེ་ལ། རྗེ་བཙུན་ས་སྐྱ་པའི་སྲོལ་འཛིན་སོ་སོའི་