[A:17b]/bde chen rten dang brten par bcas kun la/ /khyab mdzad 'khor lo'i mgon der phyag 'tshal lo/ /brgya byin sbrang rtsi'i bde la ma chags par/ /chags bral chos kyi bde la yid 'dun byed/ /tshangs chen chags bral bde bas ma khengs par/ /zag med bde chen 'khor lo bskor ba bskul/ /de yang 'dir bdag cag gi bla ma dam pa/ thub pa'i dbang po'i bstan pa ma lus pa 'dzin pa'i bdag po/ so so thar pa'i rtsa ba tshugs par bzung bas/ nyan thos kyi bstan pa btsun pa dang / rgyal sras kyi spyod pa rlabs po ches byang chub sems dpa'i bstan pa bzang por mdzad pa dang / mdo sngags ma lus pa la shes rab kyi dbang po rgyas pas/ rdo rje'i theg par rmongs pa mtha' dag sel ba la mkhas pa dang / ngo mtshar can gyi mdzad pa rmad du byung bas/ bstan pa rin po che spyi dang / ngo mtshar can gyi brgyud pa so so'i srol ma nyams pa/ lhag chad med par bzung nas mtha' yas pa'i 'gro ba mtha' dag skal ba bzang por mdzad pa de nyid kyi zhal snga nas/ rje btsun rnal 'byor gyi dbang phyug birWa pas/ yang dag par rdzogs pa'i sangs rgyas rdo rje 'chang chen po las brnyes pa'i gsung ngag rtsa ba rdo rje'i tshig rkang 'grel pa dang bcas pa dag gi dgongs pa/ ches shin tu las dang po par gyur pa dag go rim ji lta ba bzhin du theg pa mchog gi rtse mo nyid du khrid par byed pa'i thabs phul du byung ba/ mdo sngags ma lus pa'i yul can nyid du mdzad nas/ 'doms pa'i phyag len gyi srol rgya mtsho lta bu'i nang nas/ phyogs re ba gang dag yin pa de dang de la/ rje btsun sa skya pa'i srol 'dzin so so'i