[A:༡༨ན]ནང་ནས། ཕྲག་དོག་པ་གཞན་དག་ན་རེ། འདི་སྐད་དུ། སེམས་བསྐྱེད་བརྒྱུད་པ་མེད་པ་དང་། །རྗེས་བཟུང་གྲངས་ངེས་མེད་པ་དང་། །སྟ་གོན་འབྲེལ་པ་མེད་པ་དང་། །སློབ་དཔོན་གྲངས་ངེས་མེད་པ་དང་། །དབང་བསྐུར་ཡོངས་དག་མེད་པ་དང་། །ལུས་དཀྱིལ་འབྱུང་ཁུངས་མེད་པ་དང་། །རྒྱས་གདབ་རིགས་མཚོན་མེད་པ་དང་། །བཟའ་བའི་དམ་ཚིག་མེད་པ་རྣམས། །ཆོས་ལྟར་བཅོས་ནས་ཆོས་མིན་བྱེད། །སྨིན་པར་འདོད་ཀྱང་འདིས་མི་སྨིན། །གྲོལ་བར་འདོད་ཀྱང་གྲོལ་མི་ནུས། །ནོར་བའི་ཆོས་རྣམས་དགག་པར་བྱ། །ཞེས་རང་གི་འགྲེལ་པ་དང་བཅས་ནས་རྒོལ་བར་བྱེད་དོ། །འདི་དག་རིམ་བཞིན་རྟག་བཅའ་བ། །འབེལ་བའི་གཏམ་ལ་ཡིད་རང་མོད། །ཕྲག་དོག་མིག་སེར་གྱིས་ལོང་བུ། །དངུལ་གྱི་ཐུར་མས་དབྱེ་བར་བྱ། །རྒོལ་བ་དང་པོ་ནི། སྤྱིར་དབུ་མ་ལུགས་ཀྱི་སེམས་བསྐྱེད་འདི་ལམ་འབྲས་ཀྱི་བརྒྱུད་པ་ལ་མེད། ཁྱད་པར་དུ་རྗེ་བཙུན་ཆེན་པོས་མཛད་པའི་སེམས་བསྐྱེད་ཀྱི་ཡི་གེ །ངོར་ཆེན་པས་སྒོ་རུམ་ནས་བརྙེད་ཟེར་བ་དེའི་སྟེང་ནས་སེམས་བསྐྱེད་བྱེད་པ་ནི། བརྒྱུད་པ་ཆད་པར་ནི་ཚིག་དེ་རང་ཉིད་ཀྱིས་ཤེས་ཤིང་། ཡི་གེ་དེའི་སྟེང་ནས་སུས་ཀྱང་བྱས་པ་མེད་དོ་ཞེས་ལམ་འབྲས་པ་ཕྱི་མ་རྣམས་ཀྱི་བརྒྱུད་པ་གྲངས་འདྲེན་པར་བྱེད་དོ། །ལན་ལ། སྤྱིར་བཤད་པ་དང་། དངོས་ཀྱི་ལན་ནོ། །དང་པོ་ནི། སོ་ཐར་དང་། སྔགས་ཀྱི་མཁན་བརྒྱུད་དང་སྡོམ་བརྒྱུད་ཇི་ལྟར་ཁས་ལེན་པ་དེ་དང་འདྲ་བ་ཞིག སེམས་བསྐྱེད་ཀྱི་སྡོམ་པ་ལ་ངེས་པ་ཉིད་དུ་ཁས་ལེན་དགོས་པ་མ་ཡིན་ཏེ། བསླབ་བཏུས་དང་སྤྱོད་འཇུག་གི་དགོངས་པས། སེམས་བསྐྱེད་ཀྱི་