[A:༢༤ན]གོན་རྟིང་མ་དེ་ལ་འབྲེལ་བའི་ཕྱིར། བསྐྱར་མི་དགོས་ན་སྒྲུབ་མཆོད་ཕྱི་མ་རྣམས་ཀྱང་མི་དགོས་པར་འགྱུར་ཏེ། སྔ་མ་གནས་པའི་ཕྱིར་ཞེས་པ་འདི། སུའི་འདོད་པ་ལ་སུ་ཞིག་གིས་སུན་འབྱིན་དུ་འཕངས་ཏེ། ཚིག་གི་བརྗོད་པ་ལ་སྐྱོན་ཆགས་པའོ། །སྐབས་འདིའི་དངོས་ལན་ནི། དབང་བསྐུར་ཚར་རྟིང་མ་རྣམས་བྱེད་པའི་ཚེ་ལྷ་སྟ་གོན་གནས་པའི་ཕྱིར། བསྐྱར་མི་དགོས་མོད། དགོས་ན་བསྐྱར་བའི་ཐབས་ནི་མེད་པ་མ་ཡིན་ཏེ། སྒྲུབ་མཆོད་དང་པོའི་དུས་སུ་སྟ་གོན་གྱི་ལྷ་ནམ་མཁར་བཏེག་པ་དེ་ཇི་སྲིད་ཀྱི་བར་ནམ་མཁར་བཞག་ནས་སྐབས་སུ་བབས་པ་རེ་རེའི་ཚེ་མར་མེ་གཉིས་ཆད་ཀྱི་ཚུལ་དུ་དཀྱིལ་འཁོར་ལ་བཅུག་ཆོག་པའི་ཕྱིར། གཞན་དུ་ན་རང་བཞིན་གྱི་གནས་ནས་འདིར་སྤྱན་དྲངས་པའི་ཚེ། གནས་དེ་ན་ལྷ་མེད་པར་འགྱུར་རོ། །གཉིས་པ་དངོས་ལན་དཔྱིས་ཕྱིན་པ་ལ་གཉིས་ཏེ། རྒོལ་བའི་བསམ་པ་དཔྱིས་ཕྱིན་པར་བསླངས་ནས། ཉེས་པ་དེ་རང་ལ་མེད་པ་དང་། རྒོལ་བ་པོ་ཉིད་ཉེས་པ་དང་བཅས་པའོ། །དང་པོ་ནི། ཕྱིར་རྒོལ་བ་ལྟར་ན་རྗེས་འཛིན་གྱི་དུས་རྗེས་སུ་བཟུང་བའི་སློབ་མ་ཉི་ཤུ་རྩ་ལྔ་པོ་དག་གིས་ཡོ་བྱད་ཕུལ་ཞིང་གསོལ་བ་གདབ། བླ་མས་དེ་དག་གི་དོན་དུ་བཞེངས་པའི་རྡུལ་ཚོན་གྱི་དཀྱིལ་འཁོར་དེ། དབང་ཚར་རྟིང་མར་ཁས་ལེན་པ་རྣམས་ཀྱི་སློབ་མ་སྨིན་བྱེད་དུ་མི་རུང་སྟེ། དེ་དག་དང་དཀྱིལ་འཁོར་འདི་ལ་འབྲེལ་པ་མེད་པའི་ཕྱིར་སྙམ་དུ་སེམས་པ་ཡིན་ལ། དེ་ཚེ་བསྒྲུབ་བྱ་དེ་ནི་ཁོ་བོ་ཅག་ལ་གྲུབ་ཟིན་པས་གཏན་ཚིགས་དེ་ཆོས་ཅན་ལ་གྲུབ་ཀྱང་ཤེས་འདོད་མེད་པས་མ་གྲུབ་པའི་གཏན་ཚིགས་སོ། །འོ་ན་ཇི་ལྟར་ཞེ་ན། ཉེས་པ་དེ་སེལ་བྱེད་ལྷུན་གྱིས་