[A:༢༩བ]པར་བཤད་པ་དང་། ཁྱད་པར་དུ་དཔེ་མཛོད་མ་དང་། སྒ་ཐེང་མ་གཉིས་སུ། རྩ་ནང་གི་ཁམས་ལས་ཡབ་དང་། ཕྱི་ཤུན་གྱི་རྩ་ལས་ཡུམ་བསྐྱེད་པར་བཤད་དོ་ཞེས་ཟེར། ལན་ལ་གཉིས་ཏེ། ངེས་དོན་ལ་གོ་བ་མ་ཆགས་ན། ཕྱོགས་གཉིས་ཀ་ངེས་མེད་དུ་བསྟན། ངེས་དོན་གྱི་གོ་བ་ཟུར་ཙམ་བསྟན་པའོ། །དང་པོ་ནི། ལས་ཉོན་གྱི་རྣམ་སྨིན་དུ་གྱུར་པའི་རྩ་ཁམས་ཉིད་སངས་རྒྱས་ཡབ་ཡུམ་དུ་འཆད་པའམ། རྩ་ཁམས་ཉིད་ལྷ་ཞལ་ཕྱག་གི་རྣམ་པ་ཅན། རྫས་གཞན་མང་པོ་བསྒྲུབ་པའི་གཞིར་འདོད་ཀྱང་རུང་སྟེ། ཕྱོགས་གཉིས་ཀས་ངོས་མ་ཟིན་པའི་ཕྱིར་འདམ་ཁ་མེད་དོ། །ཇི་ལྟར་ཞེ་ན། ལས་ཉོན་གྱི་རྣམ་པར་སྨིན་པ་ནི། རང་བཞིན་རྣམ་དག་གི་སངས་རྒྱས་དང་། གློ་བུར་རྣམ་དག་གི་སངས་རྒྱས་གཉིས་པོ་གང་གི་ཡང་ངོ་བོ་ཉིད་དུ་དབང་པོ་ཆེ་སུས་ཀྱང་བསྒྲུབ་མི་ནུས་པ་དང་། བསྐྱེད་རིམ་དང་རྫོགས་རིམ་གྱི་ལྷ་གང་ཡིན་ཡང་འདྲ་སྟེ། བསྒྲུབ་གཞི་ཞིག་ལས་བསྒྲུབ་དགོས་ན་དེའི་མཐར་ཐུག་གི་རྩ་བ་གཞི་དུས་ཀྱི་ཡེ་ཤེས་ཉིད་ལ་ཐུག་དགོས་པའི་ཕྱིར། གཉིས་པ་ནི། ལུས་རྩ་དང་། རྩ་ཡི་གེ་དང་། ཁམས་བདུད་རྩི་དང་། སྙིང་པོ་ཡེ་ཤེས་རླུང་སྟེ། དཀྱིལ་འཁོར་བཞི་པོ་ལ་སངས་རྒྱས་ཀྱི་སྐུ་བཞི་པོ་རང་བཞིན་ལྷུན་གྲུབ་ཏུ་གནས་པ་དང་། ཡོན་ཏན་གནས་གྱུར་དུ་བྱུང་བ་གཉིས་གཉིས་སུ་དབྱེ་དགོས་པ་ནི། ཇི་སྐད་དུ། རང་བཞིན་རྒྱུ་ལ་བསམ་ན་ལྷུན་གྲུབ་སྟེ། །མཐའ་ཡས་ཡོན་ཏན་ཚོགས་རྣམས་གནས་གྱུར་ཡིན། །ཞེས་སོ། །དེའི་ཕྱིར་ལུས་དབྱིབས་ཀྱི་དཀྱིལ་འཁོར་དང་། དེའི་ཆོས་ཉིད་སྤྲུལ་སྐུ་རང་བཞིན་ལྷུན་གྲུབ་དང་། དེ་བཞིན་དུ་རྩ་ཡི་གེ་དང་། དེའི་ཆོས་ཉིད་ལོངས་སྐུ་རང་