[A:༣༠བ]དབང་བཙན་ལ། དབང་གི་རྟོགས་པ་བརྗོད་པའི་ཚེ་ནི་ཕྱི་མ་དབང་བཙན་ནོ། །ཆར་མེད་སྤྲིན་ཚོགས་དང་མཚུངས་པའི། །བརྒལ་ལན་མང་པོ་དེས་ཅི་བྱ། །ངེས་དོན་ཉི་མ་གཅིག་ཤར་བས། །ཅལ་ཅོལ་མུན་པའི་ཚོགས་ལས་གྲོལ། །རྒོལ་བ་བདུན་པ་ནི། རྒྱས་གདབ་རིགས་མཚོན་མེད་པ་དང་། །ཞེས་དང་། དེའི་རྒྱས་བཤད་དུ་ཡང་ཁ་ཅིག་རྒྱས་གདབ་ཀྱི་སྐབས་སུ། སམྦུ་ཊི་ལས། རྡོ་རྗེ་སེམས་དཔའ་ཞེས་བྱར་བཤད། །བདེ་བ་དམ་པ་རུ་ནི་བརྗོད། །ཅེས་པ་འཁོར་ལོ་དྲུག་ཏུ་འདོད་པ་རྣམས་ཀྱི་ལུགས་ལ་སྤྱི་གཙུག་གི་འཁོར་ལོ་རྡོ་རྗེ་སེམས་དཔའ་བསྒོམ་པ་ལ་འབྲུ་མནན་པས་ཆོག་མོད། མན་ངག་འདི་པའི་ལུགས་ལ་རྒྱས་འདེབས་ཀྱི་ལྷ་བསྟན་པ་མིན་ཞིང་། དེ་དང་མཐུན་པར་སློབ་དཔོན་དགྲ་ལས་རྣམ་རྒྱལ་གྱིས་ཕྱག་རྒྱ་བཞིའི་རྒྱས་འདེབས་ལས། ཀུན་གྱི་དབང་བསྐུར་གནས་སུ་ནི། །རྡོ་རྗེ་སེམས་དཔའ་ཟླ་བའི་མདོག །ཅེས་བཤད་པས་ལུས་དཀྱིལ་གྱི་ལྷ་ལ་རྡོ་རྗེ་སེམས་དཔའི་རྒྱས་འདེབས་རྒྱུད་དང་རྒྱ་གར་བའི་དགོངས་པ་ཡིན་པར་གསལ་ལོ། །ཞེས་ཟེར་ཞིང་། ངག་འདོན་གྱི་སྐབས་སུ་ལུས་དཀྱིལ་གྱི་ལྷ་ཐམས་ཅད་ལ་རྡོ་རྗེ་སེམས་དཔའི་དབུ་བརྒྱན་ཞེས་ཟེར་རོ། །དེ་ལ་སམྦུ་ཊིའི་ལུང་དེའི་རིགས་བདག་གི་རྒྱས་གདབ་སྟོན་པར་གང་ལས་བཤད། གནད་ཀྱི་གསལ་བྱེད་ལས་ནི། གསང་བ་ལ་ནི་སའི་ཁམས་ཞེས་པ་ནས་བརྩམས་ཏེ། ཆོས་ཀྱི་སྐུར་ནི་རབ་ཏུ་གྲགས། །ཞེས་པའི་བར་གྱིས་རང་བྱུང་གི་ཡེ་ཤེས་ཀྱི་མཚན་ཉིད་སྟོན་པ་ལས། དེ་ལ་རྒྱས་པར་བསྟན་པ་དང་། བསྡུས་ཏེ་བསྟན་པ་དང་། ཤིན་ཏུ་བསྡུས་ཏེ་བསྟན་པའོ། །དང་པོ་ལ་གསུམ། རྟེན་ཞུ་བ་འབྱུང་བ་ལྔར་