[A:༣༡ན]བསྟན་པ། བརྟེན་པ་བདེ་བ་ཡེ་ཤེས་ལྔར་བསྟན་པ། དེ་ཉིད་རིགས་ལྔར་བསྟན་པ། ཞེས་གསུངས་པའི་རིགས་ལྔར་བསྟན་པའི་སྐབས་སུ། ཤིན་ཏུ་རྣམ་དག་ཡེ་ཤེས་ཆེ། །རྡོ་རྗེ་སེམས་དཔའ་ཞེས་བྱར་བཤད། །ཅེས་པའི་ཚིག་རྐང་གཉིས་སྡེབས་ཏེ་མི་བསྐྱོད་པ་དང་རྡོ་རྗེ་སེམས་དཔའ་གཉིས་ཀ་ཕྱོགས་གཅིག་ཏུ་ཐམས་ཅད་བདག་ཉིད་དུ་སྟོན་པའི་གཞུང་ཡིན་པས། དེ་ནི་རྒྱས་པར་བསྟན་པའི་སྐབས་ཡིན་ལ། བདེ་བ་དམ་པ་རུ་ནི་བརྗོད། །ཅེས་པ་ནི། བསྡུས་ཏེ་བསྟན་པ་ལ་རྟེན་ཐིག་ལེ་བསྡུས་ཏེ་བསྟན་པ་དང་། བརྟེན་པ་བདེ་སྟོང་བསྡུས་ཏེ་བསྟན་པ་གཉིས་ཀྱི། བརྟེན་པ་བདེ་སྟོང་བསྡུས་ཏེ་བསྟན་པ་ཡིན་པར་གསུངས་པས། གཞུང་མཚམས་ཀྱང་ཐ་དད་ཅིང་། རིགས་བདག་གི་རྒྱས་གདབ་སྟོན་པར་དོགས་པའི་གནས་ཙམ་ཡང་མེད་ལ། རང་བློས་སྦྱར་བས་རྗེ་བཙུན་གོང་མའི་ལུགས་སུ་འགྱུར་རམ། སློབ་དཔོན་དགྲ་ལས་རྣམ་པར་རྒྱལ་བའི་གཞུང་ཡང་ཕོ་བྲང་དྲུག་པ་སྟོན་པའི་གཞུང་ཡིན་གྱི། རིགས་བདག་གིས་རྒྱས་གདབ་སྟོན་པའི་གཞུང་མ་ཡིན་ཏེ། གཞུང་གི་སྐབས་ལ་དཔྱད་པས་ཤེས་པ་ཡིན་ནོ། །དེ་ལྟར་ན་སྒྲུབ་བྱེད་རྣམ་པར་དག་པ་མེད་བཞིན་དུ་རྗེ་བཙུན་གྱི་གསུང་རྣམས་དོར་ནས་གཞན་དུ་སྨྲ་བ་འདི་ལ་དགོས་པ་ཅི་ཞིག་ཡོད། འོ་ན་རྗེ་བཙུན་གོང་མའི་གསུང་ལས་ཇི་ལྟར་བཤད་ཅེ་ན། སྲས་དོན་མ་ལས། དབང་རྟགས་ནི་ལྷ་ཐམས་ཅད་ལ་བླངས་ན་གཙོ་བོ་ལྔ་ལ་སྐུ་རྡོ་རྗེ་རྣམ་སྣང་ལ་སོགས་པའི་རིགས་ལྔ། འཁོར་རྣམས་ལ་རང་རང་གི་གཙོ་བོའམ། ཡང་ན་ཐམས་ཅད་ཀྱི་དབུ་ལ་གནས་ལྔར་རྡོ་རྗེ་རྩེ་ལྔ་པ་རེ་རེ་བསམ་མོ། །ཞེས་དང་། འཕགས་པ་རིན་པོ་