[A:31a]bstan pa/ brten pa bde ba ye shes lngar bstan pa/ de nyid rigs lngar bstan pa/ zhes gsungs pa'i rigs lngar bstan pa'i skabs su/ shin tu rnam dag ye shes che/ /rdo rje sems dpa' zhes byar bshad/ /ces pa'i tshig rkang gnyis sdebs te mi bskyod pa dang rdo rje sems dpa' gnyis ka phyogs gcig tu thams cad bdag nyid du ston pa'i gzhung yin pas/ de ni rgyas par bstan pa'i skabs yin la/ bde ba dam pa ru ni brjod/ /ces pa ni/ bsdus te bstan pa la rten thig le bsdus te bstan pa dang / brten pa bde stong bsdus te bstan pa gnyis kyi/ brten pa bde stong bsdus te bstan pa yin par gsungs pas/ gzhung mtshams kyang tha dad cing / rigs bdag gi rgyas gdab ston par dogs pa'i gnas tsam yang med la/ rang blos sbyar bas rje btsun gong ma'i lugs su 'gyur ram/ slob dpon dgra las rnam par rgyal ba'i gzhung yang pho brang drug pa ston pa'i gzhung yin gyi/ rigs bdag gis rgyas gdab ston pa'i gzhung ma yin te/ gzhung gi skabs la dpyad pas shes pa yin no/ /de ltar na sgrub byed rnam par dag pa med bzhin du rje btsun gyi gsung rnams dor nas gzhan du smra ba 'di la dgos pa ci zhig yod/ 'o na rje btsun gong ma'i gsung las ji ltar bshad ce na/ sras don ma las/ dbang rtags ni lha thams cad la blangs na gtso bo lnga la sku rdo rje rnam snang la sogs pa'i rigs lnga/ 'khor rnams la rang rang gi gtso bo'am/ yang na thams cad kyi dbu la gnas lngar rdo rje rtse lnga pa re re bsam mo/ /zhes dang / 'phags pa rin po