[A:༣༢ན]ཐམས་ཅད་རྒོལ་བ་རང་ལ་ལོག་པས་ལུང་རིགས་ཀྱི་གོ་བ་མ་ཆགས་པར་བསྟན། གྲུབ་མཐའི་རྟིང་མ་ཚུགས་པར་ལུང་འདྲེན་མང་པས་གོང་མ་ལྔ་འགལ་བ་ཅན་དུ་ཁས་ལེན་དགོས་པ་རྣམས་བྱུང་བ་ཡིན་ནོ། །རང་གཞུང་རྩ་བ་འཇིག་འདོད་པའི། །ལུང་རིགས་བྱིངས་ཆེན་ཁམས་པོ་ཆེ། །འདིར་བྱུང་མཐོང་ཐོས་སྐད་མེད་པར། །རང་གཞུང་འཛིན་ལ་གྱ་གྱུ་ཅན། །ཁྱོད་མིན་གཞན་ཡང་མང་འདིར་མཐོང་། །བསམ་སྦྱོར་དགོས་པ་གཞན་མེད་དམ། །རྒོལ་བ་བརྒྱད་པ་ནི། བཟའ་བའི་དམ་ཚིག་མེད་པ་རྣམས། །ཞེས་སྨྲས་ནས། དེའི་རྒྱས་བཤད་དུ། གཞན་དག་ན་རེ། དབང་བསྐུར་རབ་གནས་ཀྱི་དུས་སུ་སྡོམ་བརྩོན་རབ་བྱུང་རྣམས་ཀྱིས་ཚོགས་འཁོར་མི་བྱེད་དེ། ས་སྐྱ་པཎྜི་ཏས་བཀག་པའི་ཕྱིར་རོ། །ཞེས་པ་ཕྱོགས་སྔར་བཀོད་ནས་སུན་འབྱིན་པ་ན། ཆོས་རྗེ་རང་གི་ལུང་དང་འགལ་བ་དང་། རྗེ་བཙུན་ཆེན་པོའི་ལུང་དང་འགལ་བ་བརྗོད་པའི་ཚེ། ཆོས་ཀྱི་རྗེས་རབ་བྱུང་ལ་དཔའ་བོའི་སྟོན་མོ་མི་དགོས་པར་བསྟན་ཞིང་། དཔའ་བོའི་སྟོན་མོ་དེ་ཚོགས་འཁོར་གྱི་དབྱེ་བར། མངོན་རྟོགས་ལྗོན་ཤིང་དུ་གསུངས་ཤིང་། ཆོས་རྗེ་རང་གིས་ཀྱང་གསུངས། ཕྱོགས་སྔ་མས་ནི། དུས་ཁྱད་པར་ཅན་གྱི་དཔའ་བོའི་སྟོན་མོ་ཡང་མི་བྱེད་པས་བཟའ་བའི་དམ་ཚིག་ལས་ཉམས། ཆོས་རྗེས་བཤད་པ་འདི། ཀླུ་སྒྲུབ་ནས་ཇོ་བོ་རྗེ་དང་། ཁ་ཆེ་པཎ་ཆེན་སོགས་ཀྱི་ལུགས་ཡིན་པར་བཤད་པས། ས་སྐྱ་པའི་རང་ལུགས་མ་ཡིན་ཟེར་བ་དང་། དུས་ཁྱད་པར་ཅན་གྱི་ཚེ་རབ་བྱུང་གི་ཚོགས་འཁོར་མ་བྱས་ན་རྩ་ལྟུང་བཅུ་གསུམ་པར་འགྲོ་བ་དེ་འཁྲུལ་སྤོང་གི་དགོངས་པ་ཡིན་ཟེར་བ་