[A:32a]thams cad rgol ba rang la log pas lung rigs kyi go ba ma chags par bstan/ grub mtha'i rting ma tshugs par lung 'dren mang pas gong ma lnga 'gal ba can du khas len dgos pa rnams byung ba yin no/ /rang gzhung rtsa ba 'jig 'dod pa'i/ /lung rigs byings chen khams po che/ /'dir byung mthong thos skad med par/ /rang gzhung 'dzin la gya gyu can/ /khyod min gzhan yang mang 'dir mthong / /bsam sbyor dgos pa gzhan med dam/ /rgol ba brgyad pa ni/ bza' ba'i dam tshig med pa rnams/ /zhes smras nas/ de'i rgyas bshad du/ gzhan dag na re/ dbang bskur rab gnas kyi dus su sdom brtson rab byung rnams kyis tshogs 'khor mi byed de/ sa skya paNDi tas bkag pa'i phyir ro/ /zhes pa phyogs sngar bkod nas sun 'byin pa na/ chos rje rang gi lung dang 'gal ba dang / rje btsun chen po'i lung dang 'gal ba brjod pa'i tshe/ chos kyi rjes rab byung la dpa' bo'i ston mo mi dgos par bstan zhing / dpa' bo'i ston mo de tshogs 'khor gyi dbye bar/ mngon rtogs ljon shing du gsungs shing / chos rje rang gis kyang gsungs/ phyogs snga mas ni/ dus khyad par can gyi dpa' bo'i ston mo yang mi byed pas bza' ba'i dam tshig las nyams/ chos rjes bshad pa 'di/ klu sgrub nas jo bo rje dang / kha che paN chen sogs kyi lugs yin par bshad pas/ sa skya pa'i rang lugs ma yin zer ba dang / dus khyad par can gyi tshe rab byung gi tshogs 'khor ma byas na rtsa ltung bcu gsum par 'gro ba de 'khrul spong gi dgongs pa yin zer ba