[A:51b]rnams las 'byung khungs kyi tshig yod par bshad pa kho na 'byung ba dang / khyad par du dpe mdzod ma dang / sga theng ma gnyis su rtsa nang gi khams yab/ phyi shun gyi rtsa las yum bskyed par bshad do zhes zer ro/ /lan la gnyis te/ 'byung khungs kyi don cung zad bshad pa/ skabs don gyi rtsod lan phyes te btab pa'o/ /dang po ni/ khyed kyi 'byung khungs kyi tshig ces pa'i rnam gzhag de ji ltar/ mkhas pa rnams la grags pa'i rtags mthar si sogs kyi rnam dbye nyer gcig byin nas tshig tu bsgrub pa'i lnga pa 'byung khungs shes pa de ltar na ni/ sngar rtags su grub zin pa'i buddha lta bu zhig la lnga pa'i dang po nga si byin nas/ de nyid du nga si ata do/ /zhes pa'i mdo de nyid kyi ata du bsgyur te/ rtags mtha'i ya dang mtshungs 'dra byas pas budha ta zhes pa 'grub la/ de sangs rgyas las shes par 'gyur/ de yang sangs rgyas las gang 'byung na chos 'byung zhes pa lta bu dang / de bzhin du sbyar bas nyi ma las 'od zer 'byung / sprin las char 'byung / zhes sogs du ma zhig 'byung ba 'di 'dra'i rigs can la 'byung khungs kyi tshig ces bshad la/ de 'dir yang sbyar na/ a~M las rin chen 'byung ldan 'byung zhes pa lta bu zhig tu 'gyur zhing / de'i tshe a~M las byung ba'i rin 'byung a~M nyid las logs su gyur pa zhig 'dod dgos pa snga ma de rnams kyi rigs pas shes la/ de 'dra ba ni skabs 'dir khas blang du rung ba ma yin te/ a~M las logs su gyur pa'i rin 'byung zhig sprul/ 'khor gyi dbus su bsgom par tshad ldan sus kyang ma bshad pa'i phyir/ des na 'di 'dra'i rigs can