[A:52a]la dgongs nas mkhyen rab dbang phyug gis/ tshig rkang bsgrigs legs mi shes na/ /don bzang smos kyang ci dgos pa'i/ /blun po rnams kyi rang dga'i tshig /mkhas rnams bzhad pu bskyed pa yi/ /'brel med sna tshogs bris pa la/ /bstan bcos yin zhes nyan bshad byed/ /blun po dga' ba bskyed nus kyi/ /mkhas rnams dga' ba bskyed mi nus/ /zhes gsungs par snang ngo / /gnyis pa la gnyis te/ yin lugs kyi go ba chags pa la phyogs gnyis mi 'gal ba/ dang po'i las can la ngag 'don gcig shos 'khrul gzhi chung ba'o/ /dang po ni/ spyir rnal 'byor pa'i rten dkyil 'khor bzhi grub tsam nyid nas sku bzhi rang bzhin gyi lhun grub yin pas/ de yang phyogs gcig la mtshon na/ sprul 'khor gyi dbus kyi a~M rtsar grub tsam nas sprul sku rang bzhin lhun grub yi ge'i gzugs su grub tsam na longs sku/ de'i bdud rtsi grub tsam na chos sku/ thams cad la khyab pa'i rlung grub tsam na ngo bo nyid kyi sku grub pa yin no/ /de lta bu'i sku bzhi rang bzhin lhun gyis grub pa'i rten dkyil 'khor bzhi lus kyi a~M yi ge de nyid zhal phyag gi rnam par grub pa ni rin 'byung yin la/ rin 'byung de rtsa yi ge'i rnam par gnas pa ni sprul 'khor gyi dbus kyi a~M yig go /de ltar yin pa yang / kha sbyor las/ he ru ka la sogs pa'i lha/ /rtsa gzugs mdzes par yang dag 'byung / /zhes dang / bde mchog rtsa rgyud las/ ji ltar phyi rol nang de bzhin/ /'di dag sngon nyid grub pa yin/ /zhes phyi rol gyi dpa' bo dang rnal 'byor ma rnams