[A:54a]ro/ /des na slob dpon rin po che'i lung de'i don ni pho brang lnga'i gtso bo rnams sa bon las bskyed pa de'i tshe bhru~M la sogs pa las bskyed la/ lus dkyil gyi tshe tsaNDa li dang mthun pa'i yi ge rnams lus dkyil gyi lhar bsgom mo/ /zhes pa'i don gnyis ka tshig nyung ngu'i sgo nas bstan pa yin pas rang gis mthong ba de kho na yin gyi/ gzhan ni gti mug go snyam pa'i phyogs re ba'i blo de dor na legs par mngon no// //smras pa/ phyogs snga'i bsam pa ma nges pa/ /phyogs 'dzin gtam gyi ca co yis/ /phyogs gzhan khegs par mngon rlom pa'i/ /phyogs re'i mig can 'ga' med dam/ /rgol ba bdun pa ni/ rgyas gdab rigs mtshon med pa dang / zhes pa'i rgyas bshad du/ kha cig rgyas gdab kyi skabs su/ sambu Ti las/ rdo rje sems dpa' zhes byar bshad/ /bde ba dam pa ru ni brjod/ /zhes pa'i don 'khor lo drug pa 'dod pa po rnams kyi lugs la spyi gtsug gi 'khor lo rdo rje sems dpa' bsgom pa la 'bru bsnan pas chog mod/ man ngag 'di pa'i lugs la rgyas 'debs kyi lha bstan pa yin zhing / de dang mthun par slob dpon dgra las rnam rgyal gyi phyag rgya bzhi las/ kun gyi dbang bskur gnas su ni/ /zhes bshad pas lus dkyil gyi lha la rdo rje sems dpa'i rgyas 'debs pa rgyud dang rgya gar ba'i dgongs pa yin par gsal lo zhes zer zhing / ngag 'don gyi skabs su lus dkyil gyi lha thams cad la rdo rje sems dpas dbur brgyan zhes zer ro/ /de la sambu Ti'i lung des rgyas 'debs bstan par gang las