[A:60b]pa'o/ /dang po ni/ rje thams cad mkhyen pa nyid kyis mdzad pa'i bla chen chos rin dpal ba'i dris lan de nyid kyis 'di'i lan yang theb pas/ 'di ltar tshogs 'khor sogs kyi zhal ta rnams la zhu ba mdor bsdus te phul na/ tshogs 'khor byed mkhan gyi gang zag de dge slong sogs rab byung yin nam/ rnal 'byor pa yin/ 'di gnyis las mi 'da' lags/ dang po ltar na tshogs rdzas la tshim tshim du longs mi spyod pa de chos rje'i dgongs pa yin pa khyed rang gis zhal gyis bzhes tshar/ de'i tshe 'o skol rnams chos gos 'dzin pa'i rab byung lags mod/ gnyis pa ltar na rang rgyud la ye shes rgyas pa'i thabs su tshogs 'khor lkog tu bya ba dang / gdul bya gzhan ma dad pa bzlog pa'i phyir du dngos su byed pa gnyis las ma 'das/ dang po ltar na bskyed rim gyi ting nge 'dzin gyis tha mal gyi snang zhen 'gog nus pa gcig dgos par chos rjes dpe dang bcas te gsungs/ 'di lta bu'i yon tan bdag la med/ rang re'i gsung yin na tha mal gyi snang zhen dang / rdzas la dag ma dag gi rtog pa ma spangs pa'i tshogs 'khor byed mkhan su yod gsungs gda' ba/ de lta bu'i nus pa yod na skyabs su mchi/ 'on kyang yon tan 'di thob par zhal gyi bzhes pa'i sngags 'chang rnams tshogs 'khor byed pa'i drung du/ lug sha bzang po gcig dang / khyi sha rul pa gcig phul na bzang ngan gyi rtog pa 'dug mi 'dug mngon sum gyis grub pa mchi/ gnyis pa ltar na gzhan gsang sngags la mi mos pa bzlog pa'i don du skye bo mang po'i dbus su dri chen la sogs pa'i ma dag pa'i