[A:61a]rdzas rnams dag pa'i rdzas su dngos su bsgyur nas gzhan gyi ma dad pa dngos su bzlog nus pa'i rnal 'byor pa chen pos byed par bshad kyi/ de rnams mi nus na byed par ma bshad gda'/ des na bdag gis nyan thos kyi sgor zhugs pa dang / rdo rje theg pa'i rnal 'byor pa la'ang so thar gang rung gi sgor zhugs pa cig nges par dgos par don la gnas shing / rje yab sras kyi gsung rab las kyang 'byung la/ rnal 'byor pa che chung gnyis ka'i yon tan gang dang yang mi ldan zhing / rten chos gos 'dzin par song bas rang gi rgyud tshod dang mthun pa'i spyod pa nyams su blangs pa lags/ yang drung pa'i gsung yig tu tha mal pa'i 'khrig pa dang / lhan cig skyes pa'i ye shes gnyis ngo 'phrod ma 'phrod ma gtogs pa khyad med gsungs pa ni/ byang chub bsgrub pa la gegs byed kyi nor pa chen po lags pas/ bdag gi zhu yig 'di sleb phyin chad grub mtha' 'di zhal nas 'don pa lta zhog thugs la'ang skad cig tsam yang mi 'chang ba zhu/ 'di'i rgyu mtshan dbang po gnyis byung bde ba ni/ de nyid yin zhes skye ngan smra'i/ de ni bde ba che nyid du/ /rgyal ba mchog gis ma gsungs so/ /zhes lung du drangs nas dgag pa yang yang mdzad pa ma gzigs lags sam/ grub mtha' 'di mu stegs kyi gsang sngags pa rnams kyi 'dod pa yin par slob dpon mai tri pas bshad pa gda' zhing / bod du rngog chos rdor bzhed pa la rje sa skya pa yab sras rnams kyi dgag pa mdzad pa de lags mod/ spyir ding sang gi sngags pa rnams kyi mi 'gyur ba'i bde ba dang 'dzag pa'i