[A:62b]pas skyon du mi 'gyur ro snyam na/ min te/ bde mchog stod 'grel las/ gang gi tshe dbang bskur ba la sogs pa'i nyin zhag la bya ba'i phyi'i dam tshig gis ni shin tu sbas pas bya zhing / phyi nas bla ma dam pa rnams kyis rigs kyi bu rnams la dgag par bya'o/ /dge slong rnams la ni dbang bskur ba'i dus su yang sbyin par mi bya ste/ chos gos 'dzin pa rnams la bla mas rang gi tshig gi thams cad rab tu bstan par bya'o/ /rnam pa gzhan du na bla ma dam tshig las nyams par 'gyur ro/ /zhes bshad pa'i phyir ro/ /des na sbyang rtogs sbar gsum dngos su nus kyang rab tu byung ba'i cha lugs 'dzin pas de lta bu dngos su byas na rang nyid la nyes par mi 'gyur yang / thub pa'i bstan pa la gnod pa'i phyir dngos su mi mdzad pa yin no/ /de ltar na dbang dus su bza' ba'i dam tshig tu gsungs pa de dag nyams par 'gyur ba ma yin nam snyam na/ dus khyad par can gyi tshe ni mkhyen rab dbang phyug gis ji skad bshad pa ltar rjes mthun pa'i tshul gyis nyams su blangs pas chog la/ rgyun gyi bza' ba'i dam tshig tu ni cho ga bzhin du bsgrub pa'i bdud rtsi ril bu ji tsam 'byor pa bsten pas dag bya de legs par khegs pa yin te/ 'grel chen de nyid las/ rnam par snang mdzad la sogs pa lnga'i ril bu yungs kar gyi tshad tsam nyi ma so sor dam tshig bsten pa'i don du'o zhes gsungs pas so/ /gsum pa ni/ spyir rdo rje theg pa'i gzhung las bshad pa'i mchod pa'i yo byad dang / tshogs kyi rdzas dang rdzogs rim bsgom pa'i tshe/ lus dub pa gso ba'i phyir du gsungs pa'i sha ni kha na ma tho